上圖係屯門小巴43號站頭，呢條小巴線係掃管笏村民唯一出入嘅公共交通路線。不過，因為呢排多咗好多人行山，成日有大班行山客等車，搞到居民周不時都出入有問題。所以，有居民就喺小巴站噴上「村民優先排隊」字句，希望村外嘅行山客可以有啲公德心，畀村民上車先。
除咗掃管笏，唔少新界村落都會受行山人潮打擾，例如大埔烏蛟騰、粉嶺嘅鹿頸，元朗嘅下白泥，都成日因為太多遊客，原本住喺到嘅居民出入屋企都有啲麻煩。
行山人士其實應該有啲同理心，如果見到村民想搭車，就不妨開口問下，可以嘅話畀佢哋搭先，唔好影響人哋正常生活。
去坪洲搶廁所紙
除咗交通問題，郊遊人士亦會打擾居民原來生活。早前全香港市民都搶購廁所紙，之但係有人去到坪洲郊遊，見嗰到有廁紙賣，竟然搶埋一份。
有坪洲居民在 Facebook 發帖，話遊客去到坪洲，除咗喺民居大聲講嘢好嘈之外，有人仲大批大批搶購廁所，買嘅數量多到要 call 貨車喺中環碼頭接貨。呢位居民話，離島都係香港一部份，要「珍惜這個家，唔L好搶爛它!」。
長洲遊客唔戴口罩
《獨立媒體》報道，長洲呢幾個周末都人滿為患，唔少遊客一落船更即刻除低口罩，話要呼吸新鮮空氣。不過長洲係香港境內喺大嶼山之外人口最多嘅離島，有二萬幾人居住，居民都好擔心疫情因此擴散。當區區議員豎立告示，呼籲遊客到埗後要戴口罩，不過唔少人一心去郊遊，一於少理。
當大家講緊郊遊行山唔好破壞郊野，唔好亂拋垃圾，唔好打擾野生動物嘅同時，亦唔好騷擾住喺郊區嘅居民。簡單如嘈音，都可以係污染嚟。
分享連結:
廣告
