[惡出國際] 香港馬騮破壞力 嚇怕外國人

金山、城門水塘一帶嘅馬騮，雖然屬該處景野生動物，吸引唔少遊客。不過佢哋惡名昭著，經常有攻撃遊客嘅報告。外國傳媒，最近亦留意到呢個情況。

上面嘅短片，係國際通訊社 UPI (United Press Internation，中譯合眾國際社) 向海外發報。內容係停車場嘅車輛 (估計係鷹巢山)，畀馬騮大肆破壞。

對香港人嚟講，馬騮呢啲行徑其實絕不新鮮。筆者親眼所見，馬騮經常會拆開車輛嘅膠邊、水撥，甚至係左右兩側倒後鏡。以下呢幾個位置，雖然可以近距離觀賞馬騮群，不過停車都唔好行開，因為一行開你部車就好易受到襲擊。

1. 鷹巢山泊車咪錶
2. 金山路 (整段)
3. 金山路頂端 (金山家樂徑入口)
4. 衛奕信徑第六段入口 (大埔道)

當然，馬騮襲擊車輛其實源於遊客過度餵飼野生動物，令佢哋唔再懼怕人類。唔少遊客，更加鍾意坐喺車入面，向車外嘅馬騮拋擲食物。久而久之，馬騮就會以為車入面會有食物。

餵飼馬騮或任何野生動物，都係違法行為。大家好自為之。

圖片來源

按：上世紀60年代，政府興建城門水塘及九龍水塘，為咗要消滅該處原來嘅有毒植物，就喺印度引入獼猴。久而久之，呢啲馬騮精喺香港落地生根，而唔少無公德心嘅遊客，經常非法餵飼，造成「馬騮惡過人」的情況。 (詳見《[有段故] 馬騮係水塘保衛隊》)