戶外活動經驗分享: 風險評估

近年户外意外頻頻發生，當中有新手有老手，而往往發生意外之前，當事人都話自己做過「風險評估」 (Risk Assessment)，究竟咩叫風險評估呢?

風險評估意思係，事前估算有可能會出現嘅意外，如何預防及評估自己有無能力去應付。

風險評估流程

1. 分析

做任何活動前，都要對目的地、路線等做 research、分析、評估，如營地有無水源、會唔會斷水、營位有幾多、屬咩地形、路線有幾長、當風時會有幾級風力等。

2. 評估

估算有可能發生嘅意外，通常都係經驗之談黎，常見意外有: 拗柴、抽筋、中暑、斷水、裝備失靈、天氣突變等。

3. 意外處理

當估計到有可能發生嘅意外後，最幫到手嘅，永遠係自己，所以要評估自己當意外出現時，可唔可以自救，如果唔得，就要搵人 carry 自己，唔好心存僥倖。

4. 事前準備

評估哂可能出現嘅風險後，就要為今次旅程做準備，準備 gear、準備體能、準備 plan B 等。

風險評估唔止適用於露營，係適用於一切活動，包括行山、游水、航海等。

現時好多新手根本無足夠經驗、知識去做評估，佢哋唔係叫評估，係叫鳩估，未有足夠能力前，都係跟從前輩指示好。

但要小心有部份「行山一流，帶隊九流」嘅人，因為佢哋往往認為自己做到，人哋都做到，搵佢哋做風險評估死得，所以唔好以為對方經驗好就一定可信。最後都係果句，去玩啫，無需以死相搏。

老hike都去camp Facebook專頁
老hike都去camp 網站