Fitz > 運動 Sports > 行山 Hiking > [武漢肺炎] 蘇格蘭行山人潮大增 維修費額外增加3億
蘇格蘭高地甚受行山人士歡迎

管理蘇格蘭郊野嘅「蘇格蘭國民信託」(National Trust for Scotland) 發表報告,話因為呢大半年因為疫情,郊外遊客數量激增,令山徑不勝負荷,維修費額外增加3000萬英鎊 (約港幣3億),該機構面臨財赤,需要推行大型籌款活動。

呢個信託機構話,自從去年底全英國實行寬緊不同嘅防疫措施,郊野山徑遇到前所未有嘅問題:

  • 遊客太多,加速山徑侵蝕情況

  • 遊客在行山時維持社交距離,山徑兩旁受損嚴重

  • 疫症期間員工停工,沒有人維護山徑

信託嘅負責人強調,佢哋好歡迎大家擁抱山野,享受大自然。不過信託財力有限,3000萬英鎊並非小數目,呼籲當地人士捐款,以渡過難關。

英國獨有: 以信託管理郊野

「英國國民信託」National Trust for Places of Historic Interest or Natural Beauty

大家可能會覺得奇怪,郊外山徑點解由信託機構管理? 基金無錢又點解向市民捐款? 其實呢個係英國獨有嘅歷史遺留問題。

英國一直實行君主制度,幾百年以來,君主都頒授大大小小嘅領地。不過,十九世紀末,唔少領地都因為領主老死,或領主財政困難,好多古跡、城堡,甚至郊野環境都缺乏保養。於是,1895年創立「英國國民信託」National Trust for Places of Historic Interest or Natural Beauty,以信託嘅形式去管理呢啲古跡及郊野地帶。直至近幾十年來行山活動於民間普及,咁信託機構順理成章管理埋呢啲山徑。

英國好多城堡都要由信託管理

「英國國民信託」負責管理英格蘭、威爾斯和北愛爾蘭地區,蘇格蘭就有「蘇格蘭國民信託」,主要收入來源係靠會員會費、資產收入 (如城堡嘅入場費),以及公眾捐款。

不過,單係「蘇格蘭國民信託」就擁有7萬6000公頃郊野土地,其中包含46座超過900米山峰、400座島嶼和大量海岸線,所以管理花費甚鉅,近年屢屢靠公眾支撐。

資料: The Press and Journal


文章為作者意見,不代表Fitz立場。