Fitz > 運動 Sports > 行山 Hiking > 湊B行山 成美國新興活動
圖: Hike it Baby

BB車可以話係唔少港爸港媽「居家旅行」必備嘅裝備,呢啲港爸港媽為求方便,去邊都要推住部BB車。事實上,唔少專家都鼓勵父母要抱多啲BB,因為抱擁可以加深父母同小朋友嘅聯系,令BB更加有安全感,以應付成長需要。

最近美國就興起「抱B行山」,仲被提倡成為對父母好、對BB好嘅活動。

媽咪行山 BB開心

住喺美國猶他州嘅 Shanti Hodges,係一位6歲小朋友嘅媽媽。小朋友出世後,佢被逼放棄最鍾意嘅行山、露營活動,全天候留喺屋企照顧小朋友。Shanti 仲留意到身邊嘅新任媽咪,唔少都被逼匿喺屋企,最多都係去健身室做下運動。

Shanti 行山癮真係大到頂唔住,結果佢就索性抱阿B行山。久而久之,發覺呢個活動對媽咪自己,甚至對BB都好有好處。媽咪嘅身體固然好咗,情緒亦開朗咗,至於BB亦比匿喺屋企較少脾氣。到而家 Shanti 嘅小朋友6歲,對大自然嘅動植物已經好熟悉,亦都好關心環保生態嘅問題。

而 Shanti 喺呢段期間,亦引導唔少新手父母齊齊結伴上山。佢成立咗群組 Hike it Baby,希望父母同BB齊齊體會野外生活。

圖: Hike it Baby

華盛頓郵報大力提廣

華盛頓郵報一篇專欄文章,對 Hike it Baby 高度評價。佢哋引述本年7月一份發表醫學期刊報告,證實「帶BB行山」可對父母同BB都極有益處。

研究由丹麥一間醫學機構發表,佢哋統計咗2004至2017年,共84份醫學研究嘅數據,發現將遠足、露營作為親子活動嘅話,對兒童嘅自尊、信心,以至適應能力和學業表現,都有出色嘅表現。

文章嘅作者亦訪問咗一位兒科醫生,亦同意行山對小朋友發展相當有好處:

  1. 改善兒童睡眠質素
  2. 加強兒童適應能力
  3. 推升兒童批判思考能力
  4. 提高升學時的科學及數學能力
  5. 提升兒童創造力

醫生提醒,BB嘅皮膚極為幼嫰,所以戶外活動記得為BB做好放曬,仲要做好驅蚊工夫,以及適時補水。

圖: Hike it Baby

資料:Hike it Baby華盛頓郵報

Fitz連結: https://fitz.hk/?p=125106


文章為作者意見,不代表Fitz立場。