武漢肺炎令世界各地嘅人更關注健康，更積極投入戶外活動，遠足露營單車成為新浪潮。喺美國科羅拉多州，就更爆出一股另類遠足熱。
據《丹佛郵報》報道，近排美國好多女生行山嗰陣，都會特登赤裸露背影相，再放上社交媒體。呢股熱潮，由全美國最多高山嘅科羅拉多州開始，近來已蔓延至其他地方，遠至阿拉斯加同加拿大都有支持者。
用裸體去宣揚權利
呢項活動嘅常客接受訪問時表示，佢哋覺得赤裸融入大自然，可以完全感受到自由自在嘅一面，所以佢哋所謂遠足，唔一定要行好遠，爬好高嘅山，只要可以進入大自然，感受一下大自然，已經好足夠。
此外，唔少參加者亦聲稱，悲痛嘅時候以呢個方式解放自己，可以忘卻悲傷，由痛苦中復元。
參加者不約而同強調，大家唔好用有色眼鏡睇呢件事，佢哋只係想用另一個角度去感受大自然啫。最後點都要提一句，根據香港《刑事罪行條例》第148條，任何人無合法權限或辯解，喺公眾地方或公眾可見的情況下，猥褻暴露其身體任何部分，即屬犯罪，一經定罪，可處罰款$1,000及監禁6個月。完。
資料: 《丹佛郵報》
自細肥仔一名，後來因發現患有脂肪肝，決心多做運動注重健康，曾參加並完成毅行者，關注所有健康資訊。
