行山遇大霧點解救?

香港郊野山頭，春天時經常有大霧籠罩，影友會叫呢個現象做「A4紙」，即係話山頭就好白紙一樣，白濛濛一片。行山人士於大霧時穿行其中，亦有一定危險性。咁行山遇到大霧，有咩方法可以減低遇上意外機率?

1. 出發前留意天氣

行山安全101嘅第一篇，係出發前以及活動途中，務必留意天氣變化。現時香港天文台有九日天氣預報、即時天氣情況，甚至有各區嘅降雨、氣溫、風速時實時追踪。如果發現天氣情況惡劣，如山徑有大霧，其實不宜出行。

2. 選擇熟悉山徑

大霧季節盡量揀選自己熟悉嘅路線，萬一因大霧迷路，你仍可知道大致方向繼續前行；或者選擇漁護署規劃良好嘅主要行山路線，例如麥理浩徑、港島徑，以及各條郊遊徑等。呢啲山徑有較良好路標及地圖指示，大霧迷路都可以依照呢啲指示搵到出路。

3. 裝備要齊全

除咗平時行山要帶備嘅糧水等，更要預備一系列「迷路求生裝備」，包括: 哨子、地圖、指南針、電筒、急救用具。而最最最最最緊要，就係手機後備電源。以現今情況，手機求救係最快捷最穩妥嘅做法，而後備電源就可保證手機喺危急時唔會無用武之地。

4. 結伴同行

無論係咪大霧，都唔應該單獨行山，特別係大霧呢種惡劣天氣，有個同伴可以減低遇上意外嘅危險。最理想就係四人同行 (除非有限聚令)。四人同行源自軍隊嘅編組方式，理論係當其中一人受傷唔行得，留一個隊員陪住傷者，其餘兩人離開搵救援或食物。

5. 迷路時求生4法

不幸因大霧或其他原因於山徑迷路，先保持冷靜，並採取以下5個步驟:

1. 利用指南針及地圖，或手機 GPS 定位，記低所在位置，以備求救時之用。
2. 若未能判定所在位置，憑記憶依原路退回至安全地方，或有人工建築之地方 (例如標距柱、欄杆、電線杆，甚至係樓梯、石級)。
3. 若找不到安全地點或人工建築，以走上高地為目標。通常高地手機接收訊號較強，且求救時亦較易被人發現。
4. 於安全情況下，發出「國際山難求救訊號」。即係吹哨子或開著電筒，依照以下方法:
   • 一分鐘內發出6次長訊號
   • 停頓一分鐘
   • 重複上面兩項，直到有救援人員出現為止。

記住，如果打電話搵到救援人員，千祈唔好懶醒離開所在地走去搵救援，記住要耐心等待。此外，大霧時聲音傳播較易，遠處嘅聲音亦可以傳得好大聲，唔好單純聽聲辨別距離。

資料: 漁護署郊野公園遠足安全指引