近日，有感於太多市民行山時亂拋垃圾，製造大量山野垃圾，唔少有心人紛紛出動，幫手去山徑清理廢物。呢啲垃圾之中，最常見嘅就係紙巾或濕紙巾。
濕紙巾雖然叫做「紙巾」，但佢嘅原材料「不織布料」(nonwoven fabric) 唔係紙亦唔係棉，而係塑膠。取代膠袋嘅環保購物袋，唔少都係用不織布製造，而呢啲購物袋，有啲係用膠樽回收再做。即係話，你將濕紙巾揼入草叢，其實即係將個膠樽亂揼，都係難以分解。而且亂揼膠紙巾比亂拋膠樽更衰，因為濕紙巾曬乾後會隨風飄揚。
早兩年有商人大力推廣「廁所濕紙巾」，鼓勵人用濕紙巾清潔廁板。不過，呢啲濕紙巾難以分解，製造嚴重污染。英國去年有反濕紙巾運動，環保團體估計每年英國棄置超過11億張濕紙巾。造成渠道淤塞及河道污染，佢哋更建議英國禁售濕紙巾。
而且市面上暢銷嘅濕紙巾成份，除了水，亦會添加許多化學成分，包括人工香精、殺菌劑 (如甲醛、苯扎氯銨、三氯沙)、保濕劑 (如丙二醇)、防腐劑 (如 MIT、對羥基苯甲酸酯、MCI、DMDM 乙內醯脲、PAPB 等)，甚至讓紙巾看起來更潔白的熒光物質; 所以，濕紙巾嘅清潔能力較佳，但亦可能會令皮膚受損。
要清潔雙手，最好其實係用番梘加清水，再唔係用消毒酒精。
按: 紙巾雖算係用紙做，但紙巾採用嘅紙漿都會加入大量纖維，以令質地堅韌，不過亦令紙巾難以分解。去郊遊抹汗，都係用毛巾好。
講求綠色、環保、天然的健康生活。推廣新一代健康生活文化。
