塔門牛無草食 非因草地沙漠化? 護牛問題引起網上爭辯


塔門係露營熱點,成日都有人留低大量垃圾 圖: 網上圖片

疫情下無得出門旅行,令香港更多人選擇露營;亦因為政府公眾營地因疫情關閉,有個大草地嘅西貢塔門成為咗露營熱點。可惜,因為露營人士眾多,令草地日漸「沙漠化」,住喺呢度多年嘅塔門牛隻,更懷疑因為唔夠草食,主動搶奪人類食物。

呢幾日,塔門牛就成為多個行山露營群組熱門話題。

塔門草原變沙漠

首先係一位鍾愛新界牛嘅網民,於十四鄉牛牛 – 西貢 Shap Sze Heung Moo Moo – Sai Kung 發帖,分享「塔門大沙漠」慘況。

從短片睇到,塔門大草地已成為沙地,幾乎寸草不生。

無咗草地令牛無嘢食?

過兩日,另一帖喺 Facebook 多個群組廣傳》文章標題《請大家勿再到塔門(Grass Island) 露營》,指「島上牛隻暫時依靠義工們由島外運來綠草續命! 作為負責任愛護郊野的市民,望能讓草地休養生息,自然環境能持續生生不息,請拒絕、組織、參與、計劃任何塔門的露營活動! 」

塔門仲有好多草?

此帖廣傳後,好幾個關注郊野嘅露營行山達人加入討論。熟悉塔門環境嘅人士,異口同聲話塔門大草地雖然「沙漠化」,但仍然好多地方有充足野草。不過,塔門牛食慣露營人士畀佢哋嘅食物 (自願或被逼),所以牛隻寧願喺營地打躉,都唔多想去遠少少嘅地方食草。

運送飼料去餵牛,當然唔係治本方法。要解決問題,首先係要教育露營人士唔好餵食牛隻,其次係要好好保護食物,從而令佢哋重回正常飲食習慣。

天行足跡: 「大自然為牛準備了食物,只是牠們失去了興趣。」

老hike都去camp: 「佢哋唔係無草食,係食慣咗有味嘅野,生活習慣改變晒。」

香港行山史: 塔門牛牛口吐白泡?

Facebook 專頁 香港行山史早前亦有出帖,指有塔門牛「成包棉花煻食晒」,反芻出嚟變為「口吐白泡」,令人深切思考,我哋真係要注意唔好畀牛隻食到人類食物,令佢哋受到不必要傷害。

塔門牛惡過金山馬騮

塔門牛係島上一份子,我哋無論去郊遊定露營,或多或少都會影響佢哋。所以,喺唔搞亂牛牛原本生活習慣嘅前題下,人類真係唔應該干擾佢哋。正如香港行山史話:

「我個人是不會在塔門的草地露營及野餐的,就像行金山或者城門時,不會明目張膽拿食物出來一樣。既然我知在金山、城門拿食物出來會被猴子搶,自然識得避免,如果我知在塔門大草地野餐會被牛搔擾及搶食物,為何還要『攞苦嚟辛』?」

所以,有人堅信問題唔係因為塔門夠唔夠草畀牛食,而係塔門太多行山及露營人士,改變咗牛牛嘅生活習性,情願留喺寸草不生嘅營地等候人類食物,都唔願意行多兩步路去食野草,亦令到塔門牛仲惡過金山馬騮。

此外,亦好似「老hike」所強調嘅,去塔門嘅山友及營友,必須嚴格遵從「自己垃圾自己帶走」原則,減低牛牛食到垃圾嘅機會。更何況,拎番自己嘅垃圾去市區棄置,係一個好合情理嘅要求。咁都做唔到,就唔好講親親大自然。


文章為作者意見,不代表Fitz立場。

歡迎投稿: http://fitz.hk/contribute/

訂閱Fitz電郵通訊,接收活動、產品及優惠資訊!

朱溫
生於亂世,有種責任。這個責任就是做好自己,感染別人。鍛練好身體,才能裝備自己,迎接亂世。