刀具喺露營用品內,都算不可或缺,甚至野外求生時,係唯一一樣可准許帶備嘅裝備。一把好刀,唔單止係入得廚房,仲可以開山劈石,咁點先算一把好刀呢?

户外刀大致分兩種: 鞘刀、摺疊刀

1. 鞘刀

又名直身刀,一般比摺疊刀長,刀抦好握同比較好力,刀身夠硬的話,可以直接劈木斬柴。有啲仲會內藏火石、指南針等工具。可惜比較大把,收納唔方便,通常會有皮刀鞘或膠刀套跟。

直身刀有分全龍骨或半龍骨,全龍骨即指把刀由刀刃到刀柄都係一體的,硬度相當有保證,當要撬時,全龍骨高下立見。

2. 摺疊刀

萬用刀係代表,輕巧、方便、收納細係佢特色。可以幾十個功能集於一身但都只係一隻手指公 size。而摺疊刀最重要係睇個安全鎖,因為一鎖唔到,隨時你隻手指就係咁先。當中有分:

活軸

瑞士刀就係用活軸,要克服打開時彈簧嘅彈力,同收起時個彈力就安全了,但活軸無一個正式鎖的,所以對啲大工程會比較危險。

軸鎖

一個極方便嘅設計,可以單手掌握到開關! 仲可以左右手都用到! 但因為機關複雜,零件又多,維修同清潔都麻煩,去完沙灘隨時 bye bye。

線鎖

最常見嘅鎖,利用刀刃尾嘅彈簧桿頂住做安全鎖,收時就推開支彈簧桿,順勢撳刀刃收埋就得,同樣係單手控制到,不過可想而知,用彈簧桿頂住嘅安全鎖有幾硬淨。

一體鎖

上面線鎖嘅加強版,同時價錢都係加強版。用法大致一樣,但安全鎖強大好多! 高階折刀通常用佢。

背鎖

打開後刀背有個機關,要鬆開先可以解鎖。強度高,安全性高,不過要雙手開關。

其他嘅如: 彈簧刀、蝴蝶刀等,香港犯法的!

而刀最重要就係咩物料鑄造,成日話鋼水好鋼水好,因為刀好多時都用鋼造,雖然有鈦合金等其他物料,但鋼喺強度、打理、鋒利性都非常出色,所以依然係主流。

刀的鋼材

聲稱係堅嘢嘅大馬士革刀

至於鋼材…. 真係可以出本書去講,所以今集都係簡略介紹,有興趣先下集細談。

碳鋼

鋒利、耐久性高,粗用一流。不過容易生鏽,保養需時。

青鋼

韌性好、硬度高,日本魚生刀常見,不過同樣容易生鏽。

不鏽鋼

以碳鋼為基礎,加入鉻,增加抗腐蝕,但降低咗韌性為代價。

大馬士革

一種已失傳嘅鋼,刀身會有一種特殊紋,稱為穆罕默德紋。相傳鋒利無比,依家市面見到嘅全部都係 fake的。

刀的保養

用咩鋼材都好,係絕對需要時間去保養,否則不鏽鋼都會生鏽。

清水洗淨

每次用完都要用清水將刀具上嘅污垢、油漬等徹底洗凈,如果好難洗,加埋洗潔精用,總之一定要甩。

棉布抹乾

洗完之後用棉布抹乾,之後自然吹乾就得。

刀油

尤其是摺刀,要得閒打刀油落去轉軸位,刀刃更加。

打磨

可以去買磨石自己操刀,不過本老hike無依個閒情逸緻,都係俾錢人哋幫我打就算。

長短

鋼材需緊要,但同時刀刃長度、厚度都重要!

  • 太長會俾空間局限,太短就不利發力。
  • 太厚就過重,太薄就太脆。

本老hike suggest 20-25cm長2.5mm以上厚為基礎,因應自己喜好而去選購。

最後,一把好刀都要配合情況而用。如果只係露營煮食用,唔需求太講究。如果係會釣魚劏魚去內臟嘅,要求又唔同咗。如果會求生用,要劈埋樹,用埋火石,又唔同了。所以選擇前,諗清楚自己玩法先,再揀適合自己嘅刀具。

老hike都去camp Facebook專頁
老hike都去camp 網站


文章為作者意見,不代表Fitz立場。

歡迎投稿: http://fitz.hk/contribute/

老hike都去camp
80後老hike一名 對行山、露營有少許認識 Msr fans,極憎nh(世界第一) 為人暴躁,仇口多,方向感差,對攝影、電子科技係屬垃圾級別