[老hike都去camp] 露營知識分享 山火應對

去年年底的雞公嶺山火

戴頭盔，本老hike無應對過山火，所以只係分享書本上知識，希望大家會用唔著。

最近，因為天氣乾燥，再加上最近嘅郊遊潮，導致山火不斷。有冇諗過如果露營期間，附近有山火時，應該要點做？首先要保持冷靜，並同時採取以下7個步驟:

1. 能否撲滅

除非範圍好細，而你又喺一個安全又有明確退路嘅地方，否則唔建議自己黎。

2. 盤點隊友

集合隊友，點人數同時要安排分工，叫大家保持冷靜。

3. 準備水及毛巾

山火中，有超過60%死因係因為吸入過多濃煙引致的。濕毛巾有助於濃煙下呼吸，而水喺避無可避嘅情況下，整濕全身，衝去已燒過嘅地方。

4. 留意風向

有助預測火勢方向，盡可能向逆風方向下山或橫移。唔好向上走或打算同火鬥快，除非你快過風。

5. 逃生路線

避免同火勢同一方向。應選擇平坦、開揚、無乜植物嘅路線離開，唔好貪快穿林甚至爆林，因為火勢好易蔓延到草叢等地方。

6. 盡快行動離開

山火蔓延速度係極難估計，大風起上黎，可以一陣間就燒過隔離山。唔好心存僥倖，一發現就要離開，為免受困，安全第一。

7. 報警求助

用112通知指揮及控制中心，盡快控制火勢，將損害減到最低。

(編按: 112為國際通用求助號碼，有任何一間電訊公司訊號都可接通，理論上比999熱線更穩陣。但若撥電話時網絡只有大陸訊號，則會打電話至內地公安機關。)

意外就係，無論你做得幾好，幾叻都好，都會因別人嘅失誤而導致發生，所以要時刻保持警覺，注意火種，安全第一。

老hike都去camp Facebook專頁
老hike都去camp 網站