自2020年疫情起,香港興起一股户外熱,露營就係其中之一。依陣露營熱唔單止令户外做成重大負荷,更將露營界嘅傳統文化扭轉! 統稱為「露營新秩序」,當中新秩序包括且不限於:

劈酒至天光

去至户外無皇管,出得黎玩當然要盡興! 要靜返圖書館。

燒地

無個 camp fire,點叫 wild camp! 睇片啲人都係用石地圍住就起火架啦,陶瓷化? 關我鬼事!

亂棄垃圾

成晚無訓咁攰,啲垃圾又有廚餘又污糟,整到啲衫點算! 放埋一邊無人知嘅!

插針

咁辛苦搭船入到黎無位? 插針都插入黎! 你唔讓開我 roll 多兩支 smoke 迫你走添丫!

大小二便後嘅紙巾

咁污糟,點拎返出去喎,都係劈埋一邊等佢自然消失啦,無人覺嘅!

鬧人唔分享X位

想去露營打卡開 party! 但官 site 又要俾人捉,你班老屎忽就自私玩唔分享x位,小圈子!

無規矩

邊個話露營有規矩架? 我淨係想出去玩、打卡呃like之嘛,去到露營就係要自由架啦,啲規矩我唔會守架。

原因

當然唔止咁少新秩序啦。至於點解會有露營新秩序出現呢,相信因為:

1. 門檻低

90年代,internet 尚未發達,新手想入門通常係透過參與制服團體、活動中心等,由導師帶領下進行。所以會學到一啲比較傳統技術及良好嘅態度。

相反現今,因為資料易搵,基本上自己做完資料搜集就出發,但中間的 detail 就靠自己腦補,當然會出好多問題,甚至唔正當嘅行為。

2. 淘寶平

以前露營,雖講唔上係高消費活動,但一啲都唔平,一隻營係隨時一個普通文員半個月人工,所以大多數入坑嘅人都係户外發燒友,而且更會拎走每一樣用品。

但當淘寶普及後,因為得來太易所以唔去珍惜,導致棄營不斷,早前新年假期,綠洲 Oasistrek 就喺東龍島收集到唔少棄置於草叢嘅營具。

3. 「KOL」

以前睇文獻、睇報紙等分享露營資料嘅人,必然係有返咁上下知識、經驗,甚至係教練級人馬。但依時kol、YouTuber 泛濫,質素參差不齊,令觀眾信以為咁做係正確、正統,正所謂上樑不正下樑歪,最終出現咗分歧。

其實舊史未必一定啱,老屎忽又唔一定大哂,不過有啲文化係需要遵守、尊重,露營係一項工藝黎,要靠大家一齊守護,唔好令其他人標簽營友就係「破壞者、消費大自然」,祝願大家身體健康,長露長有。


文章為作者意見,不代表Fitz立場。
歡迎投稿: http://fitz.hk/contribute/

⮑ YAS HYKE 行山保 保障範圍涵蓋全港所有山野及行山徑,5程僅需$75 (Fitz 讀者優惠$50/5程),便享有意外醫療、財物以及身故賠償等保障,合共保額超過HK$300,000。
首頁 > 運動 Sports > 行山 Hiking > 露營 Camping > 露營新秩序 (2022年版)