露營,係指在户外地方過一晚夜,有時真係迫不得已要喺啲非理想嘅地形上紮營的,咁如果真係要面對依個問題時,就先要了解有機會遇上嘅地形。

草地

草地係最常見地形,一般只需要搵平地就已經好舒坦,但都要留意附近有無蟻巢、係咪低窪地區、近唔近溪澗等問題,營釘最好可以用全入地如7字釘,以防草面遮蓋咗釘尾後睇唔到而發生意外。

長草地

不太適合紮營,因為長草位下多蛇蟲鼠蟻等窩藏,如必要時,要留意下面有無樹枝插穿個營,同注意生火,營釘都要用全入地的,以防意外。

泥地

完全唔適合紮營,泥地隨時會深陷,令自己陷入危機,同時清潔方面非常麻煩,營釘要用長形如沙釘、雪釘等高抓地能力嘅先比較好。

沼澤地

外貌係似平草地,但一踩落去就會賴野,唔可以紮營。

石地

石地有一危險性,就係爛、磨爛營底,所以必須用 Oxford 布等做嘅 footprint 去保護營底。同時因為石地唔舒服關係,睡墊要用比較厚身上墊高自己同隔地氣。營釘方面唔太建議用,因為石地唔會自然修復,如真係要用,要用比較堅硬如鍛釘、棺材釘等。

沙地

沙地好舒服,因為屬可移動地形,只係清潔比較麻煩,又有沙蚤出沒。營釘要用沙釘或雪釘等先安全,最好用石頭或沙袋,不過用後記住放回原處,同時要留意潮汐水線,唔好太出。

雪地

香港無乜機會遇到,如果去外地,要注意睡墊R值,營有無雪裙等。營釘方面,必須用長雪釘,唔好懶!因為雪地氣候變化得太快,安全最緊要。

發掘營地時,最重要識得留意地形,唔係度度地方都適合過夜,玩還玩,安全最緊要,同時要做到 LNT (Leave No Trace),咁先可以保護地點等下一手都可以享受同等環境。

老hike都去camp Facebook專頁
老hike都去camp 網站


文章為作者意見,不代表Fitz立場。
歡迎投稿: http://fitz.hk/contribute/
首頁 > 運動 Sports > 行山 Hiking > 露營 Camping > 露營知識分享: 地形應對