天氣驟冷,想露營不妨考慮「車中泊」(車上露營),揸住部車去到邊露到邊,而且匿喺車上,就唔使理外面咩天氣。

韓國四名男子,早幾日就揸住部由巴士改裝而成嘅露營車,去到高興郡露營。當晚天氣寒冷,佢哋幾個中佬開住柴油暖爐匿喺車上飲酒,人人飲到醉晒,點知有人第二日一睡不起。

其中一名50歲男子當場宣告死亡,另一名男子昏迷不醒,情況危殆。

「車中泊」注意空氣流通

經過調查後,有關當局判定事故原因,係四名男子喺車內使用柴油暖氣機,造成一氧化碳中毒,情況同喺靜止車輛上開冷氣瞓覺差不多。

事關,當汽車引擎發動時 (或今次嘅柴油暖氣機),會因燃燒汽油釋放一氧化碳,再由死氣喉排走。平時汽車行駛時,排出嘅一氧化碳就會散發喺空中 (隧道入面就靠通風系統),所以唔會對人有即時危險。不過當汽車停低時,死氣喉嘅一氧化碳,就會由汽車嘅罅隙 (汽車並非完全密封) 流入車廂。

天氣點差都好,喺車上瞓覺要留意空氣流通。

根據美國國家消防協會 NFPA 的防火手冊,吸入輕量一氧化碳 (0.02%) ,2至3小時會產稱輕微頭痛; 重量 (0.08%),45分鐘會頭暈、反胃、抽筋; 極重量 (0.16%) 20 分鐘會頭痛、暈眩,2小時死亡。

所以,就算天氣點凍都好,「車中泊」都唔好將車上嘅窗口閂晒,可以留一條小罅。而且每隔一兩個鐘,落車行下呼吸下清新空氣。

資料: 全南新聞


文章為作者意見,不代表Fitz立場。
歡迎投稿: http://fitz.hk/contribute/
首頁 > 運動 Sports > 行山 Hiking > 露營 Camping > 韓國「車中泊」焗出禍 四男一死一昏迷