私人營地環境點? 本地Youtuber揭營友缺公德心

擁有接近100萬訂閱戶嘅本港 Youtuber，人稱「大J」嘅 Jason，早排去新界一個私人露營場露營。不過佢喺影片中透露，佢隔離營一班人喺營地食煙，晚間仲大聲聽音樂，佢一心一意去露營就係諗住享受郊野寧靜，不過就畀呢啲無公德嘅人大掃雅興。

影片發佈3日，有超過13萬人睇，唔少人留言聲討呢一類無公德人士:

• 飲酒音樂加後生仔，玩到一兩點識收皮已經好生性
• 試過幾十人有大人有細路嘈到兩點幾。啲細路周圍走直頭追逐到入埋我哋個天幕都無人理。
• 其實唔駛露營，只要平時留意身邊各種行人，乘客或遊人，你不難發現，香港五成人或以上已毫無道德/公德
• 去露營就係為左放鬆同貼近大自然，要大大聲播歌要大大聲傾計就返自己屋企啦
• 1點解散已經好好，我試過比人嘈到清晨4點幾先可以瞓
• 11點1點真係還好，上次我隔離3-4點仲係咁喺度大叫 ……

事實上，疫情之下政府營地封閉差唔多兩年，加上大家無得去海外旅行，令呢啲露營場越開越多。如果營地管理不善，就真係貼錢買難受!