[老hike都去camp] 露營經驗分享 野味的攻防戰

常言道: 果度係佢哋屋企黎，我哋唔好驅趕佢。咁……做乜點蚊香，用蚊怕水? 歧視? 蚊都有屋企架!

露營遇到牛、野豬、狗應該要點做?

其實一般野生動物都會驚人 (塔門已經係市區，隨時見人多過屋企隻狗)

遇到任何野生動物

• 唔駛驚 (保持霸氣)
• 唔好妄想用食物引走 (只會令佢認為依度有人餵，成晚來回玩)
• 唔好攻擊佢 (除非你係戰鬥民族)
• 唔好用強光照佢 (俾popo照咗9個月，香港人都應該知係咩心情)
• 眼神唔好離開佢 (野生動物只會從後攻擊)
• 食物即時處理 (開緊爐唔駛驚，驚火的)

牛牛應對

真係需要驅趕，可以用木互相敲擊，用聲音攻擊，仲可以揮揚深色衫

野狗應對

野狗正常唔會攻擊人類，除非你入咗佢地盤，或你solo同時佢「哋」當你獵物

真係去到對峙情況，對眼望實佢，慢慢退後，唔好跑，唔好示弱

野豬應對

依個係 big boss，攻擊力高，性格暴躁，水陸兩用，移動力快

不過唔會主動攻擊人，如果真係過黎，離開現場，之後佢就會走

防獸setting

其實如果成日招惹到野生動物，要檢討自己嘅 setting

1. 食物要搵個大袋袋住，用先一樣樣拎出黎，方便走佬
2. 垃圾要放入垃圾袋，食物殘餘要包好，睡前吊高，當食物處理
3. 餐後必須要清洗餐具
4. 真係驚嘅，買個焚火台起個 campfire 可保平安
5. 唔好餵食或扮可愛親近野生動物，令到習性改變

切勿攻擊野生動物! 佢唔還拖，唔係你好打，係佢唔想打死你咋

切勿再餵食野生動物! 攪到牛都變家明

老hike都去camp Facebook專頁
老hike都去camp 網站