露營「煮飯神器」Mess Tin 軍用飯盒

近年，有個新 term 「煮食神器」冒起，甚至有一個專 for「煮食神器」嘅食譜添，究竟依舊野有咩咁架勢呢?

原來係講 Mess tin。Mess tin 嘅 design 絕對唔係新鮮野，民初甚至一戰時已經有類似嘅產物。一般 mess tin 都係鋁合金制造，導熱效果好又保持到個重量同硬度。而緊密式外蓋，令到蒸氣唔易外洩，所以煮飯方面相當出色。同時深度夠，所以蒸、炸、焗、煮甚至打邊爐都無問題。亦因為咁，內藏空間可以收納爐頭、火機、筷子、萬用刀等。

不過由此一般 mess tin 都無 coating (塗層) 關係，就算用油煎野都相當痴底，功用上大打折扣，所以令佢只可以煮飯用咁。

其實 mess tin 對 solo 黎講係相當好用，不過要有多樣配件配合先實用起黎。

1. 蒸架

Mess tin 最出色嘅一項，當有咗蒸架後，蒸點心蒸海鮮相當開心，可以話必備。

2. 手抦

Mess tin 得一個盒，要做到煮完飯仲可以煎啲餸，就需要用個蓋當煎pan用，但要加個可除式手抦先得。

3. 牛油紙

鋁蓋仲要無 coating 嘅用黎煎野咪即係玩自己? 依個情況，可以用牛油紙幫手，不單止唔需要落油而唔痴底，更加唔駛諗啲油點處理，方便懶人一族。

4. 鐵砂掌

因為 mess tin 嘅緊密性外蓋做得好而出色，亦因為咁導致受熱後係相當難打開，要做到的話，一係練成鐵砂掌，一係用隔熱手套。ps 本老hike 就係用鐵砂掌配合萬用刀打開的。

5. 砂紙

不論 trangia 出品、Aeon 出品定係淘寶嘅買到嘅 mess tin，個邊位都係相當刮手，所以一開返黎就要先用砂紙磨邊開封，唔係就遲早受傷。

Mess tin 係好用，但不至於必備、神器，唔需要過份追捧，要煮到好飯，需要嘅係廚藝，而唔係飯煲，最緊要係…識個肯煮嘅營友就得。另外留意返，mess tin 個底好薄，如果火力太過集中或燒既時間過長，係有燒穿的可能性。