Fitz > 運動 Sports > 行山 Hiking > 露營 Camping > 露營友投訴車group噪音 惡人邏輯:「想靜點解唔去圖書館?」
疑似事發地點

營友踏上惡人谷。一個 Facebook 露營群組近日爆發衝突,事情大概係咁:

  • 下晝: 營友同女友揸車去營地,當時無乜人,諗住可以安安靜靜露營
    (更新: 有指事主到達時已見車友,對方有建議可到較高地方紮營)
  • 黃昏時份: 突然多部汽車駛至營地一帶,估計係車group聚會
  • 晚上8-9點: 車group越玩越嘈,聲浪達至「party級」
  • 晚上11點: 營友網上向車group中人有禮貌地投訴,要求將音量收細
  • 與此同時,車group有人發現營友將事情post上Facebook,開始發矛。有人話要用車阻住營地,唔畀營友落山
  • 有車group人回應營友:「想靜點解唔去圖書館?」
  • 凌晨1點: 部份車輛離開,有車友向營地長響銨
  • 凌晨時份: 營友襯道路暢通,抽身離開

好好地去露營,點解去咗惡人谷?

睇到呢度火都嚟,人無恥真係無敵? 明明自己破壞安寧,但可以將歪理當真理。呢種「惡人邏輯」再發展落去,真係乜都可以正當化:

我係要喺度揼垃圾,想乾淨點解要行山?

我係唔鍾意戴口罩,驚病菌點解要出街?

問人「想靜點解唔去圖書館」,咁點解唔問下自己,想開P點解唔去 party room?

當然喺荒山野嶺,官府在遠拳頭在近,加上有人玩得興起時,往往唔懂得控制自己,難免要忍氣吞聲。但仍然可以盡量記住惡人細節 (如樣貌、身高,以至車牌),喺安全嘅時候報警求助。


文章為作者意見,不代表Fitz立場。