露營知識分享: Ultra Light 背囊

一般露營 backpacker 嘅背囊都 60L up，而有班 hardcore camper 會追求輕而細，依種玩法就叫ultra light (UL)。UL 玩法背囊盡量都會控制喺30L內，老hike 今日分享 UL 背囊選擇要點。

戴頭盔先，本老hike 絕對唔係UL專家，只係略懂皮毛， 各 hardcore 用家如有意見，歡迎分享埋俾其他人學野。

喺揀 UL backpack 之前，先要入手一套 UL gear，因為 UL backpack 一般都係空間細、負重廢，所以 gear 要輕細為主，base weight 要控制到喺 15 pounds (6.8kg) 內先可以叫合格。如果砌唔到，就唔太適合用 UL backpack了。

另因為 UL 背囊空間細，加上大多無背板嘅關係，pack 袋方面相當要技巧，否則會相當頂背同重量唔 balance 孭得好辛苦。

點先係好背囊?

準備好後就要物色一個好背囊，本老hike 會以以下幾點去選擇:

1. 設有外網袋

30L空間非常有限，所以 pack 袋後都盡量唔想拎返出黎。外網袋就可以將啲雜物如: power bar、gel、filter、風褸等放入去，方便自己使用。

2. 肩帶水樽位

用得 UL 背囊，好大機會都係需要行一段路嘅地方，所以中途飲水係好大機會。但如果用水袋又佔用太多空間，用外側袋就麻煩，所以老hike會揀有肩帶水樽位，方便飲水。

3. 背墊

因為為咗輕，所以大多 UL 背囊都無負重系統，甚至無背架，所以有背墊會令到個背囊硬淨少少，孭得無咁辛苦。有部分用家會外加睡墊墊背，做到物盡其用。

4. 側橡筋繩或頂底扣

好多 UL 用家都鍾意用蛋墊，蛋墊唔好處就係收納大舊，依個時候，就可以用背囊嘅側橡筋繩或頂底扣將蛋墊外掛。

5. 留意 maximum 負重

每個袋都會有佢嘅最大負重嘅重量，雖然玩得UL都應該唔會過，但計埋食物、水等就難講了，當一過咗個 maximum，就會有爛膊(袋)嘅風險。

6. 品牌車功

每個袋都必定有線口位，而每間廠都有唔同車線技術，車功差會做成: 高低膊、袋變形、爆線口等情況。如果唔了解品牌車功建議做多啲功課聽吓口碑先，免得行到半路斷膊就大獲。

7. 物料耐用度

UL 最貴嘅地方係布料，因為要做到薄而耐用係貴的，常見物料有:

X-pac

做風帆布起家嘅 DIMENSION-POLYANT 開發出黎嘅黑科技，用特殊方法將三種唔同嘅物料粘上，表層係用防撕裂性高嘅布如: corduro、ristop nylon 等做保護，底層用複合 pet 做防水膜，而中層用 x-ply去做支撐保護層同防水膜角色。

X-pac 防水度極高，再加上 x-pac 本身比較挺身，表層又可以用 ristop nylon 令個袋 colorful 咗，所以好多日系袋都會用 x-pac，而最影響到 x-pac 嘅耐磨、重量、價錢都係睇個表層布，唔好睇到 x-pac就狗衝。

Tyvek

Tyvek 由 Dopont 公司出產，本身用途非常廣泛，上至醫療用保護衣，下至foot Print甚至當畫紙都大有人在，而 Tyvek 本身都好多分類，用編號黎表示分別，例如:

• 編號10開頭為 hard structure 硬身構造
• 編號14開頭為 soft structure 軟身構造
• 編號16開頭為 perforated soft structure 有窿而軟身構造

舉個例子: Tyvek® 1056D，就係硬身同比較 firm 嘅 Tyvek，常見用黎當紙用，比賽號碼布等。詳情可以到Dupont度參考個對照表。因為輕身、堅韌、有防水功能，最緊要係價錢平，所以好多自家品牌都喜愛選用。

Dyneema

喺分享 Dyneema 大力馬之前，要介紹多幾個字: DF、DCF、dyneema X、cuben fiber、CTF3

Dyneema Fabric (DF)

Dyneeme 原絲，用返傳統經緯布織法織成，無任何添加。

Dyneema Composite Fabric (DCF)

大馬士複合式布，與其稱為布，不如用膜黎形容會似啲，因為布係織出黎，DCF係壓出黎，分咗三層，表底都係 poly 薄膜，得中層先係 Dyneema，目的係減重，但依種壓製嘅技術唔係個個廠有，所以DCF價錢依然高企嘅原因。

Dyneema X

聽個名好型，事實上……只係一塊 nylon 布上，中間溝咗啲 dyneema 線落去用經緯法編織而成，個X應該係懶型加上，鍍金扮金器啲fd黎。

Cuben fiber、CTF3

因為最早期 DCF 係由一間叫cubic tech嘅公司發明的，該公司將當時嘅 DCF 名為 – cuben 而高質 cuben 就叫 CTF3，後來 cubic tech 被 Koninklijke DSM N.V 收購後，正式改名叫 Dyneema Composite Fabric (DCF) 沿用至今。

唔好睇 DCF 成個垃圾袋咁，DCF 係非常有內涵，防水、防UV、輕、挺……等等，所以主流 UL 背囊都係用 DCF 布多。

UL 背包重點唔係個袋，係點樣執個袋，重量重心一偏就孭得好辛苦，所以要熟悉自己每個件裝備嘅大細、重量，課金係唔會送技術的，懂得運用每一件裝備，先係一個好 camper。

老hike都去camp Facebook專頁
老hike都去camp 網站