Fitz > 運動 Sports > 行山 Hiking > 露營 Camping > 露營經驗分享.十大實用戶外用品

露營文化超過200年歷史,由以前的苦行方式,漸漸變得現代化。露營裝備更加日新月異,每月都有不同product (產品) 誕生,喺咁多年嘅進化下,唔知你哋又鍾意啲咩產品呢?

今次本老hike分享自己最欣賞嘅十大戶外用品 (排名不分先後)

蚊機

雖然蚊機只係將家用電蚊片户外化,但最神奇地方係,喺户外有風嘅地方都做到應有表現,效果亦相當出色,可以話必備用品。

銀底天幕

塗銀技術唔係新鮮野,遠至30年前,世界仲叫簫灑少女時都已經有,但銀底天幕對露營界貢獻不少,為大家中午煮飯時降低熱傷害,更可以減低皮膚癌機會,值得擁有。

Filter (濾水器)

Filter 嘅出現,令到取水地點變得多元化,補給點大增,出發時要拎嘅水就可以少啲,從而輕啲,更加可以有效阻隔細菌及微生物,減少燃料使用,水都冰涼啲。

尿袋 (鋰電池)

雖說露營應該放低電子產品,好好享受大自然,但鋰電池嘅出現,令到大量用品户外化,例如風扇、projector (投影機)等。更可以取替唔環保嘅電芯,減少垃圾。

Dcf 布

Dcf布嘅出現,將成個 ultra light 嘅水平提高,更令到其他布料如 nylon、x-pac 等都有自我突破,不過更令露營文化更加昂貴。

負重系統

一個背囊出唔出色,最重要取決於負重系統,負重系統嘅出現,令大家可以孭得更多更重,同時可以保護背部、腰部,如果無負重系統,相信 backpacker 數量必然大減。

茶籽粉

未認識茶籽粉前,户外煮食後要洗器皿係相當麻煩。尤其是打邊爐後,又油膩但又唔可以用洗潔精破壞環境。但自從用茶籽粉後,洗器皿變得方便,更可以洗頭沖涼用,非常好用!

Google map

正確上,好用嘅係衛星圖。以往未有衛星圖前,要發掘x位係要四圍行、四圍撞先可能發現。但自有Google Map 後,可以足不出戶地從衛星圖找尋平地或水源,定位後再實地勘察,大大降低所需時間及風險。

風繩

正確上,係繩結。當識運用繩結,就可以減少好多不必要嘅用具,又可以現場製作好多用具,包括: 燈架、水搭、晾衣服架甚至枱、床、櫈都做到!所以繩結係必學。

脫水飯

脫水飯歷史尤久,但早30年前嘅脫水飯係難食到似狗糧,幸好脱水飯有跟隨時代進步,依家已經變得好好食同好方便。脫水飯嘅進步令到縱走變得方便,食方面亦無咁單一,做後備食糧不錯選擇。

以上十樣本老hike都認為對露營文化係有種衝擊的,不過再好嘅用具,都要技術去配合,否則都只會係垃圾。

原文載於老hike都去camp


文章為作者意見,不代表Fitz立場。