露營經驗分享: 團體戰

露營除咗solo同自己一家人恤髮 (出發) 外，好多時都會約人或join其他人團。老手們對住新手總會哭笑不得，新手們面對老手們無從入手。所以今次本老hike分享下團體戰時有乜可以幫手。

1. Social network group

由召集人先將全部參與者加入谷先，方便資訊 update 同事前同團友交流，又可以了解/表達大家嘅需要，所以最先要準備一個谷 (可以係 Facebook 或 WhatsApp 群組)

2. Notice post

開谷後需要準備一個 notice post，方便大家跟進進度同俾新加入團員知道情況，本老hike用開格式如下:

• 1-2/6 @ x位
  集合時間: 0900
  集合地點: 西貢碼頭
  預計回程時間: 1500
  路線: xxx>xxx 約一小時路程
  參與人數:
  老hike
  老mike

3. 菜單

當 notice Post 攪掂，就要同大家夾菜單，通常分兩類，一類自己煮自己，到時 share 食，另一類大圍菜式，由多位營友擔當大廚一職，其他人充當執馬角色。當選擇大圍菜式，大廚喺準備食材方面有咩困難最緊要出聲，否則無人會知你得唔得。同時餐單要列清楚係幾時、邊個煮，等其他人配合，gear方面可以夾一夾，睇吓有無duplicate嘅地方。常見餐單格式如下:

Day One

• 早餐: 西貢碼頭早餐
• 午餐:
  • 口水雞 老hike
    酸辣粉 老mike
• 晚餐
  • 可樂撈飯 老hike
  • 可樂雞翼 老mike

Day Two

•  早餐: 辛辣麵 老hike
• 午餐: 自備

4. 夾gear

如果一班老手去，都無乜 gear 有需要夾，反而係煩惱拎咩出去好。但一般玩法都會同其他夾一夾啲公家野，常見公家野: 天幕、天幕桿、水袋、濾水器、枱、燈、紙巾、垃圾袋等，免得有太多重複出現。

5. 主動幫手分工

萬一gear、煮食方面都幫唔到手，可以喺搬運方面著手，搬都唔得就考慮當洗碗工，實行有錢出錢有力出力。

6. 埋數

回程後盡快埋自己今次拎過幾多錢出黎，然後放上谷俾會計埋數，舊時埋數後好麻煩，又要過數又要夾acc，現時有 PayMe FPS等易攪好多。盡可能唔好拖大廚咁耐數，畢竟人哋出錢又出力的。

團體戰講求係分工合作同團體精神，一個人做哂係會死，但乜都唔做就會被人black list，諗吓自己可以擔當咩位置，自自然然就大家都鍾意同你去 camp。