呢個帳幕只賣$399喎

網友報料,話 Facebook 出現多個疑似售賣A貨戶外用品網。呢啲網站用超低價錢引人落叠,售賣假貨甚至收取訂金後走數。而因為賣家只係一個虛擬帳號,出事後難以追查,追討損失甚為困難。

真.假 Kailas 凱樂石

一個叫做「Kailas-戶外用品HK」專頁,早前開賣「一房一廳3人帳幕」(型號 DOD RIDER’S TANDEM TENT),售$399,聲稱只限頭50名買家。呢款帳幕網上售價約$3000港幣,佢哋賣$399引起唔少人懷疑。有人向專頁查詢帳幕細節,結果被 block,令人覺得呢個 page 有可疑。

有問題專頁
Kailas 官方 Facebook 專頁

Kailas 凱樂石係著名大陸品牌,為越野賽 HK 100 多年贊助商,規模絕對唔細。不過,睇睇呢個「Kailas-戶外用品HK」專頁,絕對唔似由大型品牌經營:

專頁簡介

想了解一個專頁,一個帳號嘅真確性,第一時間可睇睇佢哋嘅「簡介」。而呢個「Kailas-戶外用品HK」,簡介嘅電郵只係 gmail,亦無佢哋官網連結

有問題專頁嘅通訊電郵只係gmail
官方專頁會同官網連結

發帖內容

呢個專頁有一年多啲嘅歷史,但加埋都唔夠五個post,而第一個post,竟然係一張外籍男士頭像相。

有問題page嘅第一個帖,就係出呢張相

銷售方式

買嘢講信用,不過呢一類 Facebook 賣嘢page,唔會好公開解釋銷售方式或價錢,乜鬼都要「PM」(私訊)。買賣時有咩爭拗,容易口同鼻拗。

Snow Peak 營幕賣$378?

另一個有問題嘅 page 叫「Familyhappy戶外」page,「Snow Peak Amenity Dome S SDE-002RH 露營帳篷」只賣港幣 $378。專頁嘅細節同銷售手法,同「Kailas-戶外用品HK」大同小異。

*Snow Peak一個水杯正價都要300

網購要留神

警察同消委會不時發布網購被騙消息,亦教咗市民好多避免受騙方法,例如去有信譽嘅商戶或網店買嘢,落單後最好見貨先畀錢等。一句到尾正如《龍咁威》話齋,便宜莫貪,定價太低嘅貨,唔多唔少都有古怪!


文章為作者意見,不代表Fitz立場。

歡迎投稿: http://fitz.hk/contribute/

朱溫
生於亂世,有種責任。這個責任就是做好自己,感染別人。鍛練好身體,才能裝備自己,迎接亂世。