早兩日Fitz.hk blogger Toby轉載咗司馬文議員嘅文章，議員先生話，喺西貢清水灣半島，釣魚翁一帶發現好多「CY下台」嘅大字。佢覺得呢啲塗鴉污染環境，仲話塗鴉嘅人係「idiot」(白痴)。
當時，Toby問過我意見，我只係睇文章嗰幾張相，唔係太了解實際情況，所以，我就覺得無傷大雅，仲懶係搞笑咁話呢啲係讖諱之言。不過，依我喺針山親眼所見，呢啲大字又真係幾鬼礙眼，直頭篤眼篤鼻！
嗱，先此聲明，我絕非嗰啲喺山頭丟塊蕉皮，都要拗要分解幾多年先可以「塵歸塵土歸土」嘅人。至於「CY下台」呢個問題，唔該睇睇我個人檔案，童叟無欺，我要真普選！
所以最初，司馬文議員話有人喺釣魚翁寫大字反政府，我原本都抱住「官逼民反」嘅心態對待。既然政府不仁，我哋何需有義？即係一如鵝頸橋公廁，畀人寫滿反英句語，其實亦都係一個宣泄不滿嘅渠道，大家無需太過介懷。
但係，我今日一踏上麥徑七段入口，行唔夠五分鐘，就已見到呢四個橙色大字：「CY下台」。而七段入口，去到第M128標距柱（即係臨攻頂前個山坡），我見到有六至七幅呢啲大字，分別寫喺樹幹同石頭，有一幅仲寫喺地下。
講真，呢幾個橙色大字，顏色搶眼，字體又大，望一眼真係幾震撼。不過短短一段大概一公里嘅山路，已經出現咁多個相同字體，就少不免令人覺得討厭。
總括而言，我支持司馬文議員，呼籲大家停止喺山頭寫大字，原因係：
- 行山其中一個重要目的，都係想遠離塵囂，呢幾個大字直頭將我夾硬拉返入火坑！
- 有氣度嘅政府見到呢啲字一定會隻眼開隻眼閉，但呢個政府喎……我最擔心政府畀錢call人上山刷走大字，甚至搞到要破石斬樹，浪費公帑又浪費人力，咁做於心何忍呢？
更多:
司馬文: 停止在郊野公園塗鴉
不可不識嘅郊野塗鴉王
山雞其他文章
Fitz Hiking 行山
十歲登上魔鬼山，二十歲游走大帽大東鳳凰釣魚翁大刀屻。志願有二：生個仔要叫阿山；登上喜馬拉雅山，掛上真普選直幡。
