37歲越南人 Ho Hoang Hung,疫情下兩年未見過喺印度孟買打工嘅老婆。呢名掛住老婆嘅好男人,趁住疫情相對穩定,決定搭飛機去孟買,點知飛機去到泰國曼谷時,先發現要拎住印度簽證先可以轉機。Ho Hoang Hung 因為身上盤川使剩一半,又好掛住老婆,就孤注一擲搭巴士去布吉島,然後買隻橡皮艇划船過去,直線距離足足有2000公里,而且孟買仲要喺印度半島嘅另一邊。

鏡頭一轉,泰國軍方收到漁民求救,話喺大海中心截到一隻橡皮艇。艇中男子身份不明,飢渴交逼,身體情況麻麻。於是軍隊出動救援,救返呢名男子。

呢名男子就係 Ho Hoang Hung,佢喺海上「划艇」18日,但仲未離開泰國,只係划咗大概80公里。佢話遇到大浪同急流,筋疲力盡。海軍進行調查,話橡皮艇只有一支礦泉水同10包即食麵,船上無 GPS、指南針,連一份簡單地圖都無。

結果 Ho Hoang Hung 被送返去泰國斯米蘭群島,而家等緊越南同印度政府點解決件事。最重要係,搞咗咁多日 Ho Hoang Hung 仲未見到老婆!

資料: New York Post


⮑ YAS HYKE 行山保 保障範圍涵蓋全港所有山野及行山徑,5程僅需$75 (Fitz 讀者優惠$50/5程),便享有意外醫療、財物以及身故賠償等保障,合共保額超過HK$300,000。
首頁 > 運動 Sports > 獨木舟 Kayak > 越南好老公為見愛妻,泰國划橡皮艇到印度最終獲救