2016年奧運,有人整咗張 meme (梗圖),內容係: “if you feel useless today, remember somebody is working as a lifeguard at the Olympics.” 用廣東話強行翻譯,就係話:「如果覺得自己好廢,試諗下奧運會嘅救生員。」

好多人認為,去得參加奧運嘅泳手一定精於泳術,救生員喺場邊只係得個坐字。不過,有媒體訪問咗由2008年開始,為美國奧運游泳選拔賽擔任救生員嘅 James Meyers,佢話呢個工作一啲都唔無聊。

James Meyers

James 話,每屆有大概700人報名做奧運救生員,最後能成功做到嘅只有50人。佢哋仲要自己出錢買機票,自己租酒店,仲要朝早5點半開工,有時做到夜晚10點。而且,奧運救生員從來唔會有榮耀,電視轉播唔會影唔到佢哋。

一個游泳池唔可以無救生員,決賽時一班精英泳手比賽,佢哋未必有機會出動。不過場館有練習時段,會有一般泳手選拔,呢啲時候往往需要佢哋出手。

美國2012奧運選拔賽,曾經有泳手心臟驟停,要由場內救生員救援,因為救援及時,最終救返呢位運動員。(見下圖)

而對 James 嚟講,做奧運救生員最大福利,就係可以近距離接觸明星級泳手,包括美國飛魚菲比斯,澳洲飛魚科比等。不過佢哋著住制服時,係唔可以搵佢哋簽名或合照。

救生員可近距隔接觸泳壇明將

亦因為咁,唔少鍾意游泳嘅救生員,可以喺呢啲頂級泳手身上,學到好多游泳知識,提升自己泳術。

奧運賽場,大家除咗要留意努力戰鬥嘅運動員,仲有背後一班默默支持嘅義工。

按: 東京奧運因應疫情,比賽時救生員唔可以走出比賽範圍,真正係背後嘅支持者。

資料: Insider

首頁 > 運動 Sports > 奧運 Olympic > 東京奧運.奧運游泳救生員,絕對唔係廢到無人有