近年中國掀起「戰狼外交」，唔少大陸民眾對呢種無懼列強嘅強硬態度極為受落，更以身體力行國家外交大方向。東京奧運，中國代表隊個別項目失利，唔少民眾戰狼上身，喺 SNS 出擊打擊「敵人」。(SNS係內地術語，即係社交平台 Social Networking Services)
水谷隼的減速眼鏡
日本嘅水谷隼同伊藤美誠嘅組合，喺中國手上取得今屆第一面奧運乒乓金牌。中國隊於賽前曾誇下海口，話要全取乒乓金牌。呢塊金牌失落後，唔少大陸民眾針對日本選手。將水谷隼嘅眼鏡抹黑話係「減速眼鏡」，話水谷隼出術。
呢個講法未必有人信，正如唔會有人信，賭神真係有副西德製嘅液晶體顯影隱形眼鏡。不過大陸「紅軍」仍然對水谷隼個人 Twitter 發動大規模攻擊，叫佢「去死」及「快點消失」。水谷隼亦發帖回應，話呢啲 message 對佢一啲傷害都無，不過呢個發言其後已被刪除。
伊藤美誠關閉微博
另一位日本混雙球手伊藤美誠亦受到攻擊，賽後被中國網民雞蛋挑骨頭，例如話佢打波時中途用手抹枱，同埋向乒乓球吹氣，有犯規之嫌；又話伊藤美誠喺比賽領先時挑釁大陸對手。
伊藤美誠多年前曾經代表遼寧隊參加甲A乒乓聯賽，廣為大陸民眾認識，亦有開設微博。奧運奪金之後，佢嘅微博迅速被攻陷，漫罵之聲不絕，最後決定關閉。
東道主成「東盜主」
男子體操全能賽日本選手橋本大輝以0.4分之差，力壓中國選手肖若騰奪得金牌。賽後大陸民眾不滿，話佢喺跳馬項目時落地出界，只扣0.1分。而肖若騰單杆「完美落地」，竟然被扣0.3分，民眾認為裁判偏幫主隊。(依照規例，落地出界真係只需扣0.1分，而肖若騰嗰0.3分係話佢完成動作後無向裁判舉手示意。)
中國網民有理無理，於內地社交平台隔空攻擊，將橋本大輝嘅相片改圖，話佢係「日本國恥」，又有人將東道主改為東「盜」主，指日本呢面金牌係偷返嚟。中共共青團安徽省委員會亦在官方微博，上載剪輯多段中日運動員對賽片段，並配以「日本選手明顯犯規動作」及「裝沒看到是嗎?」等內容。
橋本大輝嘅 IG 當然成為開刀對象，瞬間就被攻陷。不過與此同時，有人去錯同樣叫橋本大輝嘅樂團鼓手 Twitter 攻擊，情況相當混亂。
同場加映: 香港人去意大利人IG洗版
張家朗奪金，原本屬於金牌得主嘅金色吉祥物，被銀牌選手格羅素拎錯。有張家朗支持者走去格羅素 IG 洗版，要人哋換返個公仔，事件一樣引起唔少風波。
資料: 
