東京奧運．各國代表團主宰奧運場館氣氛

東京奧運因為疫情拒絕現場觀眾，不過唔少賽事嘅比賽氣氛仍然無跌watt，因為各國代表團主宰住場館氣氛。

比賽無現場觀眾入場，但就容許已進入「奧運防疫氣泡」嘅代表團進入場館觀戰，而呢啲人員只係可以靜靜睇比賽，唔可以出聲打氣。不過呢啲包括選手、工作人員及傳媒嘅各國代表就有理無理，落足全力為自己國家打氣，有媒體就訪問呢啲喺場邊打氣嘅代表團人員。

3X3 籃球

蒙古隊教練:「日本住咗有好多蒙古人，但佢哋唔可以入場，運動員相當失望。我就喺場邊幫埋佢哋打氣!」教練唔單止大叫，仲敲打塑膠坐椅，令氣氛急升 (可惜蒙古最後七戰皆北)。

體操館

俄羅斯體操選手 Lilia Akhaimova，話佢唔使比賽時，都會拉晒所有人去體操場館為隊友打氣，佢話因為場館無觀眾，要靠佢哋製造氣氛:「我哋會互相加油打氣，幫得幾多得幾多。」或者因為咁，俄羅斯於體操項連奪男女子團體金牌。

乒乓球館

日本歷史性贏得乒乓球混雙金牌，教練倉嶋洋介 (Yosuke Kurashima) 指出，過去佢同球員都習慣無論去到邊比賽，現場都有大批中國球迷震耳欲聾嘅打氣聲。「以前中國球迷嘅歡呼聲會淹沒一切，今次東奧無晒呢班球迷，令各國有返晒自己嘅打氣乒團。」

資料: 聯合新聞網