《香港跑步節》香港人無份?

Fitz.hk Facebook專頁轉載咗《香港跑步節》嘅消息之後，隨即引來網友嘅強烈反應。大家批評嘅重點，就係話呢個所謂嘅「跑步節」拒絕香港居民參加。雖然活動網頁未有明言，但根據種種跡象睇，《香港跑步節》似乎唔歡迎香港人參加：

1. 你要有國內電話
2. 你要有支持寶帳戶或微信支付
3. 報名費以人民幣結算
4. 報名表要填上港澳來港通行證號碼
5. 佢哋同時推出3000人仔嘅旅遊套餐，跑完就去迪迪尼或者海狗公園

同情地諒解，主辦嘅單位係《Runner’s World》(中國版)，就當佢哋係一時疏忽，係設計表格嘅時間有錯漏。不過，喺香港版嘅《Runner’s World》想同活動劃清界線嘅時候，露出狐狸尾巴。佢哋喺facebook發出嘅聲明話：「大家熱烈討論的2016RW香港跑步節，其實是《Runner’s World 跑者世界 – 中國版》於農曆新年期間，為內地遊客主辦的一項跑步旅遊活動……」好嘞，明白晒，《香港跑步節》原來真係唔受香港人玩嘅。(呢個位要講得清楚少少，主辦單位係無講明唔受香港人玩，實際操作上，香港人亦有可能成功報到，但難度係極高)

本來，內地人合法來港，鍾意去西洋菜街唱歌又得，去迪迪尼打尖又得，甚至上到針山大叫大嚷，我哋香港人其實無佢哋符，亦唔想理佢哋。不過，跑步比賽涉及好多問題，係會影響到香港市民，咁究竟主辦單位準備好未？

1. 今年年中，有三項鐵人賽喺上址舉行，據說因為上址居民反對，令政府拒絕其申請，而大會被逼取消踩單車一項，得番兩項玩。那今次居民的意見是怎樣呢？點解政府呢次又批准佢哋申請？會唔會有雙重標準呢？
2. 安全：任何大型活動必須要安排醫療支援，長跑比賽尤其需要。但一個非香港居民參加的活動，他們會否動用了香港嘅醫療資源？若有大批參加者受傷入院，又會否影響急症室的正常輪候時間？
3. 就算活動得到政府部門批准，但當中涉及不少公眾地方 (佢哋有半馬賽，就算倉鼠圈都有5K一圈啩?)，乜香港唔係有土地問題？點解仲有多餘地方畀境外人搞個咁大型嘅活動？

部份網友留言

我哋已向大陸版《Runner’s World》查詢活動嘅詳情，或者因為冬節關係，暫時仲未收到佢哋回覆。如果大家嘅推斷屬實，一個喺香港境內舉行嘅《香港跑步節》，竟然係唔歡迎香港人參加。就好似，你搵晒腳去我屋企打麻雀，但又唔畀我落場一樣咁荒唐。

更多：
Fitz.hk Facebook專頁
香港長跑行山比賽
Fitz Running 跑步