Mat 完賽一刻,狀甚痛苦。

38歲嘅 Mat Wheelhouse 為咗紀念去世嘅父親,早前報名參加今個月英國曼徹斯特馬拉松 (Manchester Marathon) 嘅半馬項目,並為治療佢爸爸嘅醫院籌款。

Mat 當日晨早搭地鐵,遇到大批比賽選手,人人裝備充足,仲有好多能量飲品食品,而佢只係帶咗一支水。結果佢發現,原來自己搞錯時間,半馬組已經已起步,眼前呢班係參加全馬嘅選手。去到起點,Mat 超級失落,唔知點同捐款善長交待,更加唔知點面對佢去世嘅父親。

六神無主之下,Mat 走去問人點算,工作人員話:「你唯一可以參賽嘅做法,就係升級全馬項目,我哋可以唔加收你報名費。」就係咁,Mat 踏上人生第一場馬拉松比賽。

完賽後 Mat 去咗飲嘢慶祝

不過 Mat 並唔係長跑高手,佢平時練習只係5K、10K左右,最長一次都係跑過17公里,所以佢跑到半路已經開始頂唔住,要不斷停低。

「當我好辛苦嘅時間,多得賽道上嘅選手同埋觀眾嘅打氣。我一停低,就有人拍我背脊鼓勵我,令我可以堅持落去。」

喺無準備之下,Mat 最終以4小時47分完賽,佢對於呢個時間當然絕對收貨。

Mat嘅籌款網頁

資料: Manchester Evening News

首頁 > 運動 Sports > 跑步 Running > 一個低級錯誤,一男子無準備下完成馬拉松