[三嬸一叔] 從攝影到跑步


我朋友 Ah Lam (Lam Sport Photos) 快將登陸,佢食得好又飲得多,運動係上世紀嘅事,中間肥胖症候群當然係必然結果。佢嗜好多多,其中一樣係人像攝影,特別係影靚女。

攝: Lam Sport Photos
攝: Lam Sport Photos

兩年前某日,佢話跟我去科學園睇我比賽同影相,有免費攝影師,我當然話好。佢好快發現影比賽相嘅好處,就係啲參賽者充滿陽光,個樣同身形都正啲,而且每個跑手都希望有張相留念,無人會黑臉或者用私隱嘅理由唔俾佢影。從此之後,佢去科學園多過我,比賽資料知得多過我,連跑手佢都識得多過我 (因為佢哋睇完啲相會俾個 like佢,同喺網上交往),當然佢重揾到一班志同道合嘅影友。

攝: Lam Sport Photos

為了影相參加跑班

佢每個星期日天未光就出發去比賽地點,為咗追求完美,佢每次都會執相,所以效果幾好,得到好多跑手讚賞,佢好享受呢種久違嘅感覺。但影呢啲相係有體力要求,所以好多攝影師都係跑友出身。佢影路賽尚可以應付,但影山賽就只可以喺山腳企定定咁影,山上風光欠奉,佢唔甘心,開始諗係咪要學跑步呢?

無幾耐之後,佢同太太參加咗一個跑班。佢無講點解佢太太都參加,可能係佢哋夫婦二人恩愛,亦可能因為班中女同學太多嘅緣故。果個跑班好有規模,每次練跑接近百人,按能力分為 ABC 三組,佢兩個當然係被編入C組。即使係咁,佢太太好快發現自己力有不逮,雖然班中美女如雲,佢有啲擔心,但都毅然退學。Ah Lam 雖然跑得辛苦,但佢性格堅毅,繼續心無雜念、目不斜視咁操練,結果佢無痛腳俾太太捉到,不過佢真係多咗隻痛腳,唯有退出跑班。

在山腳影相,中圍跑出了 攝: Alan Lam 相對倫 @run-pic.com

休息咗半年,佢見隻腳無咩嘢,於是開始喺屋企附近慢跑,每日3K左右,每逢周末就半行半跑帶住龐大嘅身軀,由鰂魚涌柏架山道走到大風㘭。幾個月之後體重減輕,腰圍變小,企喺度可以見到腳趾,而唔係肚腩,最重要係經常處於危險地帶嘅血壓竟然不藥而愈,佢嘅開心真係無法形容,於是又開始諗係咪要再參加跑班呢? 但因為之前嘅經歷,佢有啲猶疑。

疫情令到大部分比賽取消或推遲,佢無相影覺得有啲失落。我介紹佢幫我跑班做義務攝影師,佢因此認識咗 豐山跑 教練KFC,亦曾經幫 Hoka 攪嘅活動影相,Hoka 所以送咗對鞋俾佢。後來佢就好順理成章咁參加教練負責嘅 Hoka 免費跑班,最近佢甚至試過孭住部相機跟跑班上獅子山,我覺得佢有啲瘋癲,但成班同學俾哂手指公,讚佢斜路跑得好,佢覺得好有成就感。

跟豐山跑教練KFC上山學法
現在已同中圍分手了,型太多

我上兩個星期同佢偶遇,企喺條街度傾咗好耐,內容全部都係關於跑步,佢話佢飲少咗酒同生活健康咗。佢身上脂肪好明顯少咗,雖然臉上皺紋重響度,膚色又黑咗,但我覺得佢年青咗、型咗。

我呢個朋友從來對自己嘅興趣好投入,我相信今次都唔會例外,最難得嘅係佢無俾之前一啲唔好嘅經驗KO,反而喺邊度跌低就喺邊度起翻身。我知道佢以後影啲相會有更多角度,因為佢走得遠咗,睇到嘅世界大咗。至於佢之後嘅跑步生活會點呢? 我都好想知道,希望日後佢自己話俾大家聽。

「三嬸一叔」的 Facebook 專頁


文章為作者意見,不代表Fitz立場。

歡迎投稿: http://fitz.hk/contribute/

訂閱Fitz電郵通訊,接收活動、產品及優惠資訊!

D大叔@三嬸一叔
「雖然快將「登陸」,心中仍有一團火,相信人生雖有起落,但凡事總有無限可能。只要用心感受,世間仍然充滿愛和希望。」