美國伊利諾伊州師奶 Jennifer Smith,原本係一位平平無奇嘅媽咪。不過,當佢喺上個月完成人生第一場馬拉松之後,佢登上《健力士紀錄大全》,成為全球焦點。Jennifer 並唔係跑得快,佢嘅成績係11小時,大多數人步行都快過佢。Jennifer 能夠打破世界紀錄,係因為佢346磅嘅體重,比2017年舊紀錄288磅更重。

我要長命啲!

Jennifer 並唔係有目標咁去打破世界紀錄。佢喺生完第四個小朋友後,體重居高不下,最恐佈嘅時候有成380磅。亦因為佢嘅體重過高,下半身關節傷患處處,開過刀、換過人工關節,都唔可以根治問題,連行步路都舉步為艱。直到舊年,Jennifer 爸爸因為心臟病去世,佢突然醒覺佢再咁肥落去,就會步佢爸爸後塵,要同親人講拜拜。

於是,Jennifer 為咗健康,為咗屋企人,終於開始積極做運動。最初由慢步開始,到九個月後,Jennifer 終於可以一口氣完成5公里路程。最後佢決定要挑戰自己,報名參加當地嘅馬拉松。

究竟我做緊乜?


比賽日7月11日凌晨4點,Jennifer 同80位選手一齊企喺起跑線前面。Jennifer 當時諗:「我咁大個人最長只係跑過8英里 (約12公里),我點解要參加咁長嘅比賽呀?」

好彩比賽開始後,Jennifer 慢慢忘卻呢個想法。佢話自己只係顧住一步一步往前跑,完全無諗過其他嘢。直到20英里左右 (約32公里),雙腳嘅水泡痛到行都行唔到。不過一諗起佢死去嘅爸爸,就乜都唔理,向住終點勇往直前。

就係咁,Jennifer 以11:50:36,完成42.195公里賽事。一個月之後,《健力士紀錄大全》確認佢呢項成績,而佢比賽當日嘅體重係346磅,打破2017年所創嘅世界紀錄288磅。

Jennifer 話,完成全馬之後,加強咗佢繼續訓練嘅決心。佢希望出年可以挑戰更高難度賽事: 50公里超級馬拉松。

資料來源: KltvRunner’s World

Fitz連結: https://fitz.hk/?p=124678

廣告
張伯倫
自細肥仔一名,後來因發現患有脂肪肝,決心多做運動注重健康,曾參加並完成毅行者,關注所有健康資訊。