[世界六大] 點解人人想跑東京馬拉松?

2016年東馬起步

更新：21.2.2018

東京馬拉松相信係香港跑手最愛，絕對係「最」，無其他! 點解「東馬」咁受歡迎，當然有佢原因：

1.「世界六大馬拉松」之一

東京馬拉松係亞洲區唯一一項「世界六大」馬拉松賽事。佢歷史雖短，喺2007年舉行第一屆，不過第七屆開始 (2013年)，已晉身為世界6大比賽，足見主辦單位嘅成功。而因為佢係距離香港最近嘅6大比賽，所以極受香港跑友歡迎。

2. 難以參加

2017年有320,000人報名全馬項目，公開名額約27,000名，中籤率只有8.4%，為歷屆新低！咁難抽得中，成為東馬跑手一定令你吸Like不少!

3. 長跑強國

日本民眾尊重長跑運動嘅現象，唔使多講。東馬絕對可感受到日本平民百姓對呢項運動嘅支持。而東馬嘅路線亦圍繞鬧市，唔少仲係香港人熟悉嘅購物旅遊區。

路線介紹

4. 友善比賽

東馬雖然係六大賽事，屬高水準比賽，不過亦適合一般跑手參加。佢嘅限時係7小時，容易過渣馬嘅6個鐘，加上賽道外民眾嘅支持，一般跑手要完賽絕對唔難。難怪佢歷年完賽率高達97%。

咁多人企定定睇你比賽，呢個經驗喺香港一定唔會有！

5. 購物盛事

東馬嘅比賽Expo，號稱係全東京最大嘅跑步購物嘉年華。單係參與商戶超過120間，就絕對令大家目不暇給。

EXPO場地圖

2018年東京馬拉松

• 日期：2月25日 (星期日)
• 全馬起步時間：早上8:10 (香港時間) (日本時間9:10)
• 最後完成時間：下午3:10 (香港時間) (日本時間4:10)
• 路線：東京都庁～飯田橋～神田～日本橋～浅草雷門～両国～門前仲町～銀座～高輪～日比谷～東京駅前・行幸通り