湖北「鄖西天河跑團」慶祝會慶無耐,已被逼解散

6月16日星期三,湖北省十堰市「鄖西天河跑團」收到縣民政局發出嘅「勸散書」,要求解散呢支民間嘅跑步團。

其實早於4月22日,上海民政局亦發出公告,要打擊24個「非法社會組織」,包括「中國老兵馬拉松俱樂部」呢類民間體育組織。

按圖放大

愛國社團用完即棄

根據內地媒體報道,當局以打擊「非法組織」為由,要求解散未有合法註冊嘅跑團。湖北呢隊「鄖西天河跑團」,啱啱成立一周年,佢哋只係每朝約埋喺公園跑步嘅團體,更加係愛國組織。跑團曾經接受過《搜狐》訪問,話佢哋一路跑步一路唱住《我和我的祖國》。

至於上海嘅「中國老兵馬拉松俱樂部」,成立於2014年11月18日,係一個由退役老兵自發組織嘅民間團體,親官方背景更明顯。佢哋成員眾多,更會舉辦公開長跑賽,甚至拍過紀錄片,知名度十分高。不過因為佢哋違反當局法例,無論幾大名氣,統統無得留低。

打擊5類社團

內地媒體指出,最近大陸官方嚴厲打擊非法社團,對5類非法社會組織打擊整治:

  1. 利用國家戰略名義,在經濟、文化、慈善等領域活動的非法社會組織
  2. 冠以“中國”、“中華”、“國家”等字樣,或打著國家機關、事業單位的下屬機構等名義,進行騙錢斂財等活動的非法社會組織
  3. 與合法登記的社會組織勾連開展活動、魚目混珠的非法社會組織
  4. 藉慶祝中國共產黨建黨100週年活動開展評選評獎活動的非法社會組織
  5. 開展偽健康類、偽國學類和神秘主義類活動,以及假借宗教旗號活動的非法社會組織

至於跑團屬於邊一個類別,實在令人費解,唔通跑步屬於第5類別「偽健康」? 有關部門並無解釋。而受影響市民亦只能默默接受,以免陷入更嚴重糾紛。

出版自由與結社自由受憲法保護

按照中共人民共和國憲法第35條,「中華人民共和國公民有言論、出版、集會、結社、游行、示威的自由。」白紙黑字列明人民有「出版自由」同「結社自由」。香港報館被封,大陸跑團被散解,我哋唔敢話有人違反中國憲法,話唔定只係大家對「自由」嘅理解有唔同。

「命定的罪,又何須有辭?」(林夕)

資料: 新浪網


文章為作者意見,不代表Fitz立場。
歡迎投稿: http://fitz.hk/contribute/
首頁 > 運動 Sports > 跑步 Running > 中國大陸取締民間跑步團,打擊非法結社