19歲嘅 Pradeep Mehra 生於印度首都德里貧困家庭,因為媽媽病重,父母都返咗鄉下,Pradeep 就同哥哥相依為命。

Pradeep 志願係考入軍隊,以改善家庭環境。不過,佢一朝早要煮飯畀哥哥,然後又要急急腳去麥當勞返工,日頭根本無時間做運動鍛練體能。於是,佢就喺夜晚麥記收工之後,一個人跑10公里返屋企鍛練身體。

有一日,印度一名電影製片人 Vinod Kapri 揸車經過鬧市,見到 Pradeep 喺大街大巷跑步,就以為佢要搭順風車,於是打開車窗,同一路跑緊嘅 Pradeep 傾咗陣,大意如下:

V: 後生仔,你上唔上車呀?
P: 唔使啦,我跑緊跑步。
V: 你做乜跑步?
P: 我想考入軍隊,所以要練體能。
V: 點解你唔日頭跑?
P: 我要返工,朝早又要煮飯。
V: 咁我而家請你食飯?
P: 唔得呀,我要趕返屋企,阿哥返夜班,我要煮飯畀佢食。
V: 而家拍緊片,我將呢條片公開得唔得?
P: 無問題呀,我又無做壞事,唔怕畀人認到。
V: 咁你要跑幾長呀? 使唔使車你返屋企?
P: 我每日跑10公里。我唔上車啦,呢個係我嘅訓練距離,上你車會搞亂我嘅訓練計劃。

事後,製片人 Vinod 真係將條片放上 Twitter,已經有過千萬人次觀看,仲引來印度政府官員及議員注意。有官員話,會安排 Pradeep 去軍部面試,亦有官員又話會幫 Pradeep 嘅媽媽安排醫療支援。

有印度高級官員更加表示: 「呢個後生仔嘅熱情同奉獻精神,好多公務員都未必做得到。」希望 Pradeep 未來有更好嘅生活。

資料: BBC


⮑ YAS HYKE 行山保 保障範圍涵蓋全港所有山野及行山徑,5程僅需$75 (Fitz 讀者優惠$50/5程),便享有意外醫療、財物以及身故賠償等保障,合共保額超過HK$300,000。
首頁 > 運動 Sports > 跑步 Running > 印度少年每晚通勤跑10公里,生活艱苦不放棄引全國關注