本月初越野界其中一項大賽《圖騰跑》受社會局勢影響無奈取消! 我和阿囡原先報了16公里的親子組別。咁長嘅路程，又有一定的攀升 (包括要在鉛礦坳上大帽山)，對她是有些少挑戰性的! 佢雖然都算有少少行山經驗，曾經行過稍有難度的有黃嶺八仙嶺、針草、大刀屻、獅子山等等，但始終未上過大帽山。
報名之初阿囡唔係太想玩，怕會好辛苦! 但係當我同佢講話跑完帶佢去麥當勞慶功，而且 all you can eat 任食，個傻女即刻興奮返哂，然後又好雀躍想了解比賽细節 (其實主要是沿路補給站和賽後的大會 party 有乜嘢食)，賽前一晚我們還很用心執拾裝備。比賽在最後一刻取消了，在理解之餘我們也有點可惜，小朋友當然也有些失望。
賽事取消之後，我在一個跑步羣組內表達了可惜但理解的心情。不久竟然收到主辦單位私訊，提議為我們度身訂造一次自製行山活動《小野人完夢計劃》，跟足原16K比賽路線，並沿途提供簡單補給。
多難得的機會! 當然不能錯過! 我在得到搞手同意後，邀請同樣報了這賽事的好友 Ernest 兄和仔仔兩家人一起參與，齊上齊落! 之後擇了一個吉日: 10月20日星期日 (其實只是要確保兩位小朋友都冇其他課外活動)。
----- 廣告 Ad -----
我們在當天早上八時，準時在比賽的原定起點城門水塘大壩起步。為了隆重其事及令成件事更似模似樣，我們都穿上賽事紀念 tee 及號碼布。主辦單位全城街馬負責人 Andes 和街馬多位朋友也親身出席陪我們一齊上路，而且沿途不停提供各式小食飲品 (朱古力、糖、餅干、蛋糕、生果等等)，兩位小朋友都食得好開心! 阿囡個咀更加係一刻都冇停!
----- 廣告 Ad -----
路線對小朋友算得上有一定難度，在城門水塘環塘後 (約7K)，要全走麥徑八段，從鉛礦坳方向挑戰全港最高峯大帽山。但兩位小朋友都很有耐力，上長命斜竟然一D都唔慢! 幾乎是一口氣半行半跑到四方亭，沒有怎樣停低休息。
毅行者還有幾星期就舉行，很多山友在操練，由於我們掛著圖騰號碼布，沿途不少山友誤會圖騰今天補賽，頗費了些唇舌解釋。
好不容易到了四方亭，我們作了最後一次補給，便開始挑戰上大帽山的一段大斜路，這段阿囡開始有點疲態，最斜路段我拖著她緩緩而行。這段上斜只有「十分斜」和「好斜」之分，捱過了「十分斜」的一段後，大家都不約而同覺得「好斜」路段變得如平路般易行!
我們終於在起步後三個多小時都達香港之巔大帽山頂了! 完成指定動作白波大合照後，繼續向終點扶輪公園進發，最後幾K髮夾彎下山，落了一陣，仲未到閘口，竟然見到媽媽突然出現，一齊跑最後一段，為阿囡帶來驚喜!
----- 廣告 Ad -----
最終我們連埋休息用了約4.5小時完成，比我心目中原先估計至少要五小時快了不少! 這成績我頗意外，事關有位十分重視各馬拉松賽事是否金標、有否爭取奧運入埸券資格的跑界 KOL 曾經寫過一篇圖騰16K 攻略及試路奇遇記，他表示他要用四小時半完成! 兩位小學雞竟然可逼近 KOL 的成績，實在令人意外!
完成「賽事」後，街馬眾位朋友為我們預備了美食，然後大家一齊興高彩烈地去麥記 all you can eat 慶功! 謹此多謝主辦單位和出席陪跑的跑友們的所有貼心安排! 你們的支持很重要，沿途悉心照顧，為我們影了很多靚相，又陪阿囡傾計講爛gag，都令全個旅程十分愉快。
當日的感覺是頗超現實，早上開開心心地參與親子自製山賽，到了下午卻夢見很劍拔弩張的場面，夢見數以十萬計的人堅毅不屈的精神，吃放題，然後仲要長途跋涉覓路歸家!
在這動盪的歲月，希望今次這個《小野人完夢》活動會在阿囡的成長中留下印記。
香港人仲有很長的路要走。這是最壞的時代，也是最好的時代。
編按: 圖騰跑大會亦已公布2019賽事取消安排及詳情，敬請留意。
