雖然龍珠熱潮廿年未減,年底仲有新劇場版上映,但我相信好多人會問,跑步同龍珠風馬牛不相及,有咩可以拉埋黎講? 係,嚴格黎講好似無關,但細心諗下,有時又會從中悟到一啲跑步道理,就等我班門弄斧一下。

訓練下去是否就可以無上限地變強?

龍珠作為其中一套熱血格鬥動漫始祖,主角們如悟空、比達,隨住故事發展同時間推移,佢地會不停突破變強,而其中經常強調係因為不斷訓練自己。但又要留意,一班配角如無閑、天津飯,其實又何嘗唔係努力不懈? 但結果都只係落得靠邊企食花生嘅命運。其實跑步都一樣,訓練的確可以變強,但每個人能力上限都有所不同,無得強求,最重要係知自己嘅位置,唔好夾硬同其他人比較,以超越以往嘅自己為目標,就算去唔到超級高手嘅高度,都可以昂然面對,就好似無閑咁,至少做到最強嘅地球人。

爛船都有三分釘?

孫悟飯本身得天獨厚,有成為宇宙最強嘅潛力,但佢無心向武,多年來疏於練習,結果淪為野比飯。不過唔只一次,只要稍為惡補努力一下,力量都叫回復到可以一戰嘅水平。唔知道大家有無遇過啲類似嘅朋友,明明身形圓潤飽滿,但偏偏訓練短短幾個月就跑得快如閃電,大多數後來會發現,原來佢學生時代係運動健將,依家只不過係全盛時期嘅七成狀態云云。運動嘅野,有時真係追悔莫及,後生時無好好打好根基,人大左之後先開始追趕,係事倍功半。咁當然啦,Never say too late,正如網絡上流傳: 一位90歲既婆婆話,最後悔嘅事就係60歲時無開始拉小提琴,否則已經拉左30年。你今日唔開始,就真係追都無得追呀。

人種的界限

龍珠迷都知道,主角群或多或少有外星血統,而並非戰鬥民族撒亞人嘅角色,基本上故事中段已經力有不逮,後期就更加車尾燈都見唔到。田徑場上人種嘅界限,尤其係短跑頂尖選手,似乎都依然係黑色人種佔比重較多,當中身體構造上,肌肉 (例如: 快速收縮白肌天生比例較多) 與骨質密度上嘅差異,似乎到今日都仲未可以單靠努力或科技去彌補。之但係,玩運動有一樣好重要,就係不輕易放棄嘅精神,今日未可以,唔代表未來都唔可以,那怕係要經過幾代人嘅努力。就好似50年前嘅女性,又點諗到女跑手依家可以光明正大咁參加波士頓馬拉松比賽? 如果 Kathrine Switzer 一早就認命認輸,可能呢個馬拉松性別平等革命,隨時推後十幾廿年先可以成功。

初心與責任


講開放棄,龍珠其中一個早期主角,阿樂,出左名係悲情人物,悲到要出外傳同佢平反 (雖然係半同人作品),到故事中段已經清楚知道自己只係庸才 (其實已經係萬中無一,但有比較下就無辦法),所以放棄勉強再求進,專心做番個普通人 (做左棒球運動員,應該在球場上所向無敵)。大家以為我一定會話:「阿樂咁易放棄,就係失敗者啦」,咁你就估錯晒啦,點解呢? 睇埋呢位人兄: 悟空先啦。貴為主角,由頭威到尾,靠既係集血統同努力於一身,無時無刻都訓練,練到唔理屋企收入、練到隨時隨地掉低妻兒、練到叫人生仔都唔好陪老婆,响咁嘅情況下成為宇宙第一,係咪就代表好成功? 其實一切都視乎初心同責任。

放番落跑步甚至其他運動度,我相信大部分人都只係業餘為興趣,只有少數人真係以此為職業。業餘跑者最初開始去跑嘅目的,不外乎係希望運動令個人身心上都變得更好更健康,舒解你平常生活或工作上嘅壓力,又或者係挑戰自己,令自己更 Tough,學慬面對生命上各種難關。咁點先係成功呢? 如果你係職業跑者,或許真係成績論英雄,但如果只係業餘跑者,就應該睇下跑步以外嘅時間你有咩轉變! 若然你話自己好鐘意跑步,好 Enjoy 跑步時帶畀你嘅歡樂,然後瘋狂地將精神時間體力都放晒落去,跟住發現自己對跑步以外既人、物、事都失去興趣,對工作產生更多壓力同厭惡,對自己應有嘅各種責任都視為妨礙,跑步以外的時間都愁眉不展等等,咁樣其實已經係一種有如毒癮嘅存在,完全同跑步嘅初心背道而馳,就算跑到識飛都完全算不上半點成功 (其實所有運動都適用)。

真正成功嘅業餘跑者,應該會有一種跑完更有動力去做其他事嘅感覺,個人做野時會更加精神,對周圍嘅人更開朗,更多嘅歡笑出現响跑步以外嘅時間度,然後呢種正能量又會帶返去訓練度,相輔相成。以龍珠嘅人物黎論講,能夠做到呢點嘅,大概就只有故事後期嘅比達,不再過量嘅不認輸精神,將家庭同訓練都愈做愈好,無再將尊嚴凌駕於至親之上,縱使擺脫唔到二奶命,那又如何?

講到呢度,你又會希望自己係阿樂、比達定係悟空?

Fitz 連結: https://fitz.hk/?p=101022





更多:
Fitz Facebook 專頁
[堅跑.後話] 19,000公里的堅.跑步故事
從跑步中見識香港家長有幾仆街
Fitz Running 跑步

廣告
AlvinCY
80後創作工作者,由聽見跑步都怕到漸漸愛上跑步,然後從新愛上運動,路跑山賽單車游水風帆咩都想玩嘅多心男生。天性愛幻想又多野諗,多愁善感又多道理,唯有寫晒出黎同人分享先至安樂。