若問邊集「咩跑會咁巴閉」最多高手雲集，想必是「長跑達人」呢一集。
國家級長跑教練 – 王春榮，人稱Miss，由佢所創立嘅「長跑達人」盛產知名跑步神人，如戰神、劉峻崚及Woody等，均屬其高徒。Miss於八十年代多次入選國家隊，出戰全運會及多項國際賽事，退役後執掌教鞭主力培訓精英。國家級運動員訓練之刻苦，不多說，但相信呢個背景，令Miss同樣要求「長跑達人」嘅同學必需認真同勤力，俾佢發現揸流灘? 根據學員嘅講法 ~ 死L梗 !
得知要去拜會如斯嚴謹嘅跑會兼面對國家級教練，堅有啲淆底，呢次點都要拉埋試跑員二號 Gabriel 嚟壯膽。
----- 廣告 Ad -----
國家級教練所帶領嘅學員到底自律到咩地步？當日同學們到場後由熱身、分組、上線、開錶….全程自動波，Miss只嚴肅地站於一旁，不發一言且並無任何指引，尤如嚴厲校長監察一班小學雞上堂般，其實畫面幾好笑。
當日Program有1 Km x 15及1 Km x 10，均屬衝刺訓練，必須用interval 速度完成，且有別其它跑會，呢度係無pacer提供，繼續自動波。但我覺得無pacer也不賴，可更清楚睇到自己嘅配速同能耐。有趣嘅係，每當Miss發現學員跑姿有問題，即使跑緊都會被的出場邊做drilling動作，要不斷做，做到啱為止先可繼續，嗰晚好似有一兩個學員下半場一直喺場邊被「厚待」!
跑姿一直有問題嘅我，好快已被指出跑嘅時候內旋過大，應該因本身有扁平足所致。二號Gabriel亦被指出跑嘅時候雙腳太黐地，導致步頻太細。拘拘幾圈，Miss已精準地指出我哋問題所在，果然係一代宗師。
過程看似嚴苛，但當你要成為精英或追求sub 3呢啲level嘅時候，就會發現呢類訓練其實好重要。距離越長嘅比賽，越要做好跑步效率。動作嘅矯正，可通過drilling動作嚟改善，而且可以減少受傷。
「長跑達人」嘅氛圍，莫名地令人自律起來，當發覺左邊嘅同學仔係戰神，右邊係劉峻崚呢類自律到極點嘅神級跑手時，莫講話上岸，連停低飲水都唔好意思。峻崚師兄話 :「Miss重視你，先會話你，如果唔同你講，自己都要醒水，自己都唔着緊自己，憑咩想Miss重視你？!」。
----- 廣告 Ad -----
「長跑達人」嘅世界讓我明白精英跑手之所以成為精英，全因佢哋重視每個細節，包括品格。戰神話 :「Miss唔止教跑步，更加教你做人態度。」世上唔會有石破天驚讓你一步登sub 3嘅program，但要培養優良跑品，呢度絕對有版你跟。
我鍾意跑步，因為佢夠誠實，你投放幾多收成就有幾多，半斤足有八両，唔會呃秤。有時會無聊地諗，若非花心同時愛上打機，全程投入跑步，又會如何呢?
