相信每個跑者都有其開始跑步嘅因由，有為減肥為健康而跑、日本小說家村上春樹為著鍛練心志應付寫作而跑，「Trailblazer」創辦人之一黃啟樂 (樂sir) 竟因為想食麥樂雞而跑 – 樂Sir 十幾歲時曾到美國交流，寄宿於偏遠小鎮，某日心血來潮想食麥樂雞，細問之下得知隔離鎮有間老麥，心諗遠極有限，一股傻勁就跑過去，怎料跑極未見，及後方發覺所謂隔離村原來於80公里外…….最終當然坐車過去食，但亦因為咁而開拓咗樂sir嘅跑者之路!
「Trailblazer」由跑壇「金童玉女」羅映潮 (Virginia) 同黃啟樂所創立，靚仔靚女，兩位皆獲獎無數。自中學開始已一齊跑步一齊比賽，甚至一齊攞獎。跑而優則教，順理成章情侶檔姿態創立跑會，男主教女管數，天下無雙，好不溫馨!
情侶檔嘅跑會，大抵想像得到會係一個充滿愛與關懷嘅跑會，感覺如父母般嘅 Virginia 同樂sir，照顧住呢個兒孫滿堂嘅「Trailblazer」大家庭，縱然子女們各有抱負，有為備戰海外馬、有為sub 3、有為PB，即使只為健康也好，同樣照顧有加。讓人更窩心嘅係曾拜讀過樂sir 嘅一段訪問:「我以前大約有九成時間自己一個人跑，後來加入跑會，明白到氣氛嘅重要性，跑會氣氛會令個人鬥志有更強爆發力。然而另一方面跑會亦可以係一個相互約束嘅場所，大家約好咗時間地點，要一齊做啲嘢，嗰件事絕對比一個人苦練更見效益。」呢番說話完全能從當晚學員間嗰份熱血及投入而深深感受到。
談吐從容嘅樂sir，心思極細密，所構思嘅訓練課表明顯計過晒數，所設定嘅里數同時間均有根有據兼不多不少，務求以最高經濟效益令學生得到最大進步，更強調希望學員需有足夠時間休息，呢種既精準且注重成本效益嘅訓練確然有別樹一幟。
----- 廣告 Ad -----
「咩跑會咁巴閉」呢個節目雖已走訪過唔少跑會，發覺 Peter 仍好喜歡問學員甚至教練們 「點解會開始跑步 ?」「跑步有咩樂趣?」看似例牌對答，答案總也離不開健康減肥減壓挑戰自我之類，點解仲要問 ? 明知故問吧 ! 誠然日子耐咗，跑步悄悄成為日常習慣甚至生活所需，你不會問點解要每天刷牙吧，但呢個反問卻令我反思起來!
嚟到「Trailblazer」就如回到讀書時期嘅課餘興趣班，是那種下課後渴望跟大伙兒聚在一起，為著共同喜好而埋首嘅熾熱。承接上期所講嘅初心，原來重點已由為何要跑步演變至如何持續如何做得更好。跑步係最誠實而性價比超高嘅運動之一，付出幾多自然收返幾多。訓練也許刻苦但收穫絕對足秤無得呃。置身跑步世界，唔需要成為最強嘅人，只要覺得「每日都有進步嘅感覺」 就已經係最大嘅收穫，還需追問因由嗎?!
