許多年以後，香港已跟數年前有著根本性嘅轉變，活於此地嘅你我他，從心境以至環境無不需要作出大幅度調節，今非昔比，開心靠自己。
從前，邊個會諗到 social run 竟會成為新興潮流甚至品牌推廣活動? 如今每個晚上每個海濱，各大小自發跑團以至各大運動品牌，從十九幾人至百九幾人，各年齡層嘅男男女女，無論認真跑社交跑養生跑，總之無人迫無人教，跑吓步吹吓水飲吓嘢識吓人，煩惱暫放下，開開心心兩三粒鐘，本少利大成效快，why not ?!
成軍七年多嘅「Hit and Run」，由幾位活力充沛兼有心有力嘅「打雜」所帶領，最初只係幾個跑友閒來相約輕鬆愉快街跑打吓卡，及後發展出不同程度嘅跑班，幾年下來漸強大，坐擁一班固定學員及追隨者，為重拾初心，拒絕成為訓練L，每月定番項目「RUN 遊」出台。
明顯玩食字嘅「RUN 遊」，無論解作溫柔地跑好，寓跑步於遊戲也好，總之一個月一次放低訓練，相約於不同地區跑少少玩多多，當然重點係食多多，以為嬉哈胡鬧隨便安排 ? 竟然有板有眼有組織，搵地點plan路線度遊戲揀食店，甚至drop bag安排，幾位「打雜」各司其職，務求盡善盡美，認真地玩方能認真好玩 !
----- 廣告 Ad -----
好很喜歡「Hit and Run」呢種巧妙地將 social run 與認真 run 交叉聯乘嘅「跑遊」格局，肯花心思為學員安排如此「認真有時 . 訓練有時 . 玩樂有時」嘅另類program，明顯花上不少工餘時間，難得有心。「RUN 遊」之後嘅指定動作 -「跑4k食40k」，可能不少高階以至專業級別跑手會認為此舉實屬前功盡毀，但嗰份快樂嗰陣笑聲嗰種開懷，不知打從何時開始於此地已變得相當珍貴，拍攝當晚所見嘅每一張真情笑臉，「Hit and Run」幾位幕後「打雜」應記一功。
令人好奇嘅係，一大棚跑友自發於都市漫跑嘅情景過往不曾出現，數年間何以大放異彩好不熱鬧 ? 於某個時間點大眾頓悟運動嘅重要性 ? 突然領略跑步真樂趣 ？還是生活壓力已變得沉重至無處釋懷 ? 安多酚以外，我哋內心深處似乎有更多的甚麼等待著排放出嚟，啱呀，開心靠自己 !
