韓國有 Running Man，香港都有，不過人哋只限明星參與，我哋呢個歡迎全民參與。
一個跑會能夠發展至尤如便利店般，梗有一間喺左近，相信暫時只有文少杰 (文sir) 嘅 Running Man Athletic Club (RMAC) 做得到。港九新界幾乎都有其分會，兼且人多勢眾，學員數以百計。有理由相信 RMAC 於本地絕對係無人不識嘅跑會，前無古人並無誇張。
大學時期嘅文sir 跟師兄弟成立 RMAC，由最初只得三班，不到十年時間竟開枝散葉至如今十九幾班，並散落於港九新界各區。拍攝當晚我哋遠征港島最東嘅小西灣運動場，估計學員大部份係港島東街坊，那份街坊間嘅情誼與學員間嘅心照不宣，感覺有別於一般跑會 ，似乎嚟聯誼開心嚟聚餐多啲，一句講晒 – 嚟玩 ! 好喜歡文sir 片中所講 :「我哋想為各區跑友提供服務。」
----- 廣告 Ad -----
搞跑班教跑步，不容置疑，但 RMAC 所做嘅似乎不僅如此，文sir 坦言做過資料搜集而定下最便宜學費，成效有目共睹。參加者可以為成就一身好武功、但求出身汗、放低日常瑣事，甚至搵理由去大魚大肉，各適其適，悉隨專便。更深感受係，如此一盤跨區「大生意」，旗下教練與助教達數十人，本以為山頭主意各自為政，但文sir 似乎更著力於以跑步將人拉近，不定期嘅分會聯誼活動更把各區連繫上，數星期前嘅台馬，RMAC 集結咗旗下300多位學員一同前往，排場直逼乜總物總，再一次民間自發全民運動之成功實例。
「為各區跑友提供服務」呢個理念無疑成就咗今天 RMAC 呢個跨區大家庭。當一個跑會發展至兒孫滿堂般遍佈各區，就能明白到跑步呢回事已不僅限於一門運動，而是為生活一部份。不為強不為快不為獎，相信呢份不為甚麼嘅純粹才是 RMAC 屹立十年至今嘅主因。各區學員每週如良朋親友般定期聚首一堂，有說有笑，interval 好養生跑也好，課堂後大伙兒理直氣壯地吃喝一番才是主課，生活煩擾盡拋腦後。嚟到 RMAC，不但絲毫沒半點壓力與緊張，反能讓你卸下裝甲，好比回到孩提時代般嘅盡情食玩瞓，還有甚麼比這更爽更令人每週期待 ?!
Why not Run?! 有一宣傳語句 -「跑步可以求冠軍，亦可以 just for fun」，我哋宣揚，成立十年嘅 Running Man Athletic Club (RMAC) 將其發揚光大且淋漓盡致。
