多得中國武漢肺炎,令地球大部份人都有個「非凡體會」,仲有好多之前諗都未諗過嘅事情,竟然喺現實中發生。所講嘅事,除咗去超市搶廁紙,就係喺長跑比賽全線暫停之下,虛擬跑竟然成為地球上僅存嘅正式比賽 (另一個或者係電競)。

虛擬跑分兩大類

虛擬跑,中國大陸稱為「線上跑」,英文 Virtual Run,係一種經由網上參與嘅活動。簡單講,參加者喺網上報名之後,完成活動目標 (例如跑42公里),再將活動電子記錄傳回主辦機構,經核實後就可取得完成活動的紀念品 (如獎牌)。

有啲虛擬跑活動可以持續成年。呢個愛爾蘭虛擬跑,畀參加者用一年時間跑1000公里

大體而言,現今世界各地嘅虛擬跑,玩法可細分為:

1. 各自完成活動

可以話係最普遍嘅虛擬跑玩法。參加者在期限內完成既定目標就可,無需集體行動。活動都可能有排名,會根據參加者嘅時間或里程而定。

2. 同時進行活動

在疫情期間,歐美流行嘅虛擬活動,如「後院超馬賽」。玩法係參加者同一時間上線起步,然後各自進行無間斷網上直播。呢個方法嘅好處係,同時可吸納觀眾睇網上直播,都有一番氣氛。

唔少虛擬跑同慈善掛鈎,呢個馬來西亞活動,就要求參加者先去捐血

虛擬跑好處

  • 唔可以參加實體比賽,都能夠畀自己推動力去訓練
  • 無時間限制,隨時隨地,甚至可喺屋企跑步機完成賽事
  • 無國界限制,可與世界各地嘅朋友齊齊玩
  • 報名費較實體跑較為便宜
  • 某些海外虛擬活動已建立一個社區,參加者可以互相鼓勵
  • 獎品具特色

虛擬跑缺點

  • 缺乏正式比賽氣氛,自己同自己玩
  • 需要自律,容易中途放棄
紀念品係虛擬跑活動最吸引人嘅地方

虛擬跑流程

  1. 報名: 細心留意活動的目標,是否在你能力範圍之內。包括活動距離、時限,以及有否特定要求 (如爬升海拔)
  2. 細心閱讀活動嘅細則,包括活動內容: 係齋跑步? 要跑幾多公里? 可以分開幾多次完成? 每次最少要跑幾多? 有無完成時間限制?
  3. 展開活動
    • 留意在限期之內的活動才算有效
    • 謹記開啟記錄活動嘅程式,以免白做
  4. 上傳記錄給主辦機構
    • 主辦機構通常有專用網頁供參加者上載活動記錄
    • 活動有無指定硬件或軟件? 還是一般跑步程式再CAP圖?
    • 是每次活動都要上轉記錄,還是完成所有活動再一次過上傳?
  5. 完成活動
    • 紀念品 / 獎品 用咩方法派發? 幾時會派發
    • 收到紀念品後,小心檢查有否破損

趁住疫情無晒比賽,虛擬活動唔知會唔會成為大家嘅一種補償呢?

全脂燃 Virtual Sport 清走腩肉大挑戰! 

全脂燃VR報名中! 8/5至6/6期間最多分10次燃燒3000大卡,或以跑步/行山/步行方式完成42公里,就可以獲得午餐肉獎牌一塊

> 詳情: 全脂燃 Virtual Sport 清走腩肉大挑戰!

資料: Active


文章為作者意見,不代表Fitz立場。

歡迎投稿: https://fitz.hk/contribute/

廣告
朱溫
生於亂世,有種責任。這個責任就是做好自己,感染別人。鍛練好身體,才能裝備自己,迎接亂世。