[挑戰世界紀錄] 賓州消防員負50磅跑半馬

來自美國賓夕凡尼亞州嘅消防員 Ryan，早前參加當地嘅半馬賽事。不過佢絕對唔係輕裝上陣，而係 full gear，孭晒成套救火裝備上身，希望可以完成半馬賽事，亦希望可以將呢項創舉收錄於《健力士紀錄大全》。

場比賽都係一般嘅長跑比賽，無乜好講。反而值得介紹 Ryan 身上嘅裝備。佢著齊晒入火場嘅防火衣、防火褲，腳上穿上長 boot，頭戴鋼盔，仲孭住一罐氧氣，以及呼吸器 (SCBA) 跑步。呢堆裝備，一共重50磅。

Ryan 喺消防局 full gear 練習。

----- 廣告 Ad -----

而佢咁辛苦比賽嘅目的，係希望可以令民眾更加明白消防員日常工作嘅辛苦，以及記念已去世嘅消防隊長爸爸。

呢次佢亦聯絡咗《健力士紀錄大全》，希望可以將成績收錄喺裏面。有關方面定下3小時30分嘅門檻。可惜，Ryan 末段力竭，只能以3小時36分完賽，未能成為世界紀錄。

不過佢呢次就籌到5,800美金嘅善款，用以幫助患病嘅消防員。

講開又講，今年一月嘅廈門馬拉松，內地消防員徐佚豪孭住20磅以3小時40分完成全馬。不過事後被發現佢用咗人哋嘅號碼布出賽。結果被當判終身停賽，不得再參加廈門馬。

新聞來源: CNN

Fitz連結: https://fitz.hk/?p=117249