英國出生嘅 Emma Timmis 移居新西蘭六年,四年前佢計劃從北至南縱走新西蘭,不過佢訓練6個月後,腿部嚴重受傷,被逼取消計劃。

Emma 12歲開始跑步,熱愛呢項運動,計劃取消令佢情緒低落。更嚴重係,Emma 係一名攀石訓練,腳傷令佢日常工作都要暫停。結果 Emma 陷入人生低潮,久久未能平伏。

四年之後,Emma 要再次實踐心願。上個月18日 Emma 由新西蘭最北端 Cape Reinga 出發,希望21日內完成約2,100公里,到達南島南端位於 Bluff 嘅Stirling Point。結果,佢成功喺1月7日到達終點,時間為20日17小時17分,打破舊紀綠嘅35日。經當局核實後,將會成為健力士世界紀錄。

呢21日,Emma 都係靠佢幾位朋友揸住露營車沿途支援,佢話最難適應係腸胃以及腳痛問題。佢跑足21日,每日至少都跑100公里。長時間跑步,令佢雙腳出現血腫、肌腱炎,兩隻腳甲亦告脫落。Emma 話,佢跑過終點之後,先發現對腳無晒感覺。

呢次 Emma 亦為新西蘭同英國兩個心理組織籌款約20萬港幣。Emma 解釋指,當年佢由人生低潮重新站起,好明白心理健康重要性。Emma 亦希望藉住呢啲機構,可以推廣心理健康教育。

資料: BBCStuff

首頁 > 運動 Sports > 跑步 Running > 攀石女教練21日完成新西蘭南北縱走2000公里,刷新健力士世界紀錄