埃塞俄比亞跑手 Deme Tadu Abate 於東京馬拉松跑出 2:05:38，排名第六成功PB，最高興就係中國網民。皆因，Deme 係李寧贊助運動員，佢繼去年柏林馬著住李寧跑鞋拎到季軍後，呢次再喺大滿貫賽事有好成績。
Deme 腳上著嘅係李寧牌「飞电 3 ULTRA」，售價2299人民幣 (約港幣$2600)。跑鞋具有個叫「靁」(四個雷字) 嘅專利科技以及一種叫「弓弓」嘅技術，推進力大為提升，觸地時間可減少。
事實上，去年疫情回落，大陸有呼聲國內品牌要「打破世界巨頭壟斷」。此時 Deme 著住李寧贏得柏林馬季軍，聲勢更大。不過，暫時只有呢位來「一帶一路」國家埃塞俄比亞嘅 Deme 較為人熟悉。
----- 廣告 Ad -----
李寧呢次成功，亦令人諗起2014年波士頓馬拉松嘅 Skechers。當年 Meb Keflezigh 以爆冷姿態為 Skechers 贏得第一次嘅大滿貫冠軍。Skechers 亦食住個勢推出專為馬拉松設計嘅跑鞋，不過似乎無以為繼。運動產品嘅設計講求長遠計劃，李寧要「打破世界巨頭壟斷」應該仲有長路要行。
