2020年上半年,全球體育活動紛紛攬炒,連奧運都要延期,馬拉松賽事又點可以獨善其身? 疫症源頭中國大陸,估計取消了超過120場800人以上比賽,所以早前有報道話,留在大陸發展嘅非洲跑手無工開,情況堪虞。

而原來呢班非洲跑手,係呢今年中國大陸馬拉松升級嘅原動力。因為:

  1. 按 IAAF 規定,要維持金、銀、銅標各級要求,要有一定比數精英選手參加
  2. 中國本土「精英」選手唔多,所以要向非洲招手
  3. 唔少非洲選手每年會逗留大陸一個月左右,參加三至四場比賽
  4. 某些重要賽事 (如北京馬拉松),獎金高達10萬美金,部份賽事會有出場費

不過因為上半年賽事延期,全球賽事都集中在下半年舉行。以六大滿貫為例,波士頓馬拉松、柏林馬拉松、倫敦馬拉松、芝加哥馬拉松、紐約馬拉松5場大滿貫賽事,就集中喺9月至11月舉行,就算係世界第一Eliud Kipchoge,亦只能參加其中一兩場比賽。所以呢班非洲跑手,喺顧及狀態及傷患問題之下,都要挑選比賽參加。

中國業內人士估計,唔少國內馬拉松都未必搵到足夠「精英選手」參加,特別係一啲獎金唔高,贊助商唔夠嘅中小型比賽,要維持 IAAF 嘅級別相信有難度。

成都係3月22日舉行一場健康跑活動,有官媒就吹風話會喺五月復辦賽事。不過,近年來國內賽事發展太快,係咪應該汰弱留強,好好整頓一下呢?

資料: 新浪網

廣告
張伯倫
自細肥仔一名,後來因發現患有脂肪肝,決心多做運動注重健康,曾參加並完成毅行者,關注所有健康資訊。