傷者到武漢市中心醫院求醫
戴口罩做運動，可引致呼吸困難，原來更可帶來嚴重影響!
湖北武漢一位26歲張姓男子 (化名)，疫情之下養成跑步習慣，每日食飯後都落街跑步，已經跑咗幾個月。早前佢照習慣戴上口罩出街夜跑，點知跑咗4公里，突然感到呼吸困難，胸口疼痛。步行返屋企之後痛楚未能消除，於是就去武漢市中心醫院求診。
醫院喺官方微博發布呢單消息，話呢位男子診斷為自發性氣胸，左肺被壓縮至90%，如果遲啲求診絕對有生命危險，及後醫生幫佢做胸腔手術，先至轉危為安。
醫生話，如果做運動期間出現呼吸困難，若再出力咳嗽，往往會引發氣胸。所以，如果做運動時身體有唔舒服，應立即停止運動，嚴重更要去睇醫生。
內地疫情放緩，不少市民已出街做運動。
資料: 聯合新聞
張伯倫
自細肥仔一名，後來因發現患有脂肪肝，決心多做運動注重健康，曾參加並完成毅行者，關注所有健康資訊。