事發嘅錢塘江

內地媒體報道,浙江一名男子晨早去錢塘江練跑,跑咗5公里出現頭暈兼呼吸困難。佢恃住自己後生諗住跑埋佢,點知跑多3公里眼前一黑,被中途發現送入醫院。

醫生話,佢入院時體溫高達40度,診斷為「熱射病」,並且腎臟受損,無法排尿;肺功能受損,呼吸衰竭;磷酸肌酸激酶超標180多倍,出現橫紋肌溶解症。隨後被轉入 ICU 進行治療,昏迷4天後回復清醒,再經過幾日休息後出院。

據了解,呢位男子係業餘高手,有多年跑步經驗,每日大概跑20公里,更曾經參加沙漠馬拉松賽。

中暑男子送咗去浙江大學醫學院附屬第一醫院

熱射病可以致命

「熱射病」又稱「重症中暑」,為中暑其中一種。患者於室外高溫及太陽照射之下,體溫急劇上升,破壞身體機能。「熱射病」特別指下視丘 (hypothalamus) 嘅溫熱中樞受到障礙,喪失體溫調節機能。

醫生話,呢名男子雖然平常有運動習慣,亦有豐富比賽經驗,不過只要一時疏忽,例如飲水不足、跑步前休息不足,亦可以引致嚴重後果。

所以,高溫之下做運動,絕對要萬分小心。

資料: 搜狐


文章為作者意見,不代表Fitz立場。
歡迎投稿: http://fitz.hk/contribute/
首頁 > 運動 Sports > 跑步 Running > 浙江業餘老手跑過沙漠,晨跑8公里「重症中暑」昏迷4日