識揀一定係揀跑山女做女朋友_01是咁的,前排有很多文章都熱烈討論一個話題: 『識揀,一定係揀跑女做女朋友。』 原因: 肯運動,身體好D,身材又Fit D,一定比較捱得苦。以上嘅論點,相信好多師兄都十分同意。

但如果搵到個鍾意行山嘅就更perfect!你諗下,喺荒山野嶺想搵個靚少少嘅廁所都無,又多蛇蟲鼠蟻,山頭烈日當空曬到死,行到攰肚餓起上黎最多都係食麵包、power bar,所以鍾意行山嘅女仔真係更加搶手。

如果完成過毅行者嘅,更加可以用『屈機』黎形容。玩得毅行者閒閒地要喺個山頭行十幾廿個鐘(20個鐘已經算好快!)再完成一百公里,比起好多男仔已經強不止十倍。 如果你有一位心儀嘅女仔同你講佢完成過毅行者,我心諗呢位師兄一定J 到出血都似。

當然,大家又唔好太葡萄。 其實每位有跑『山』女友師兄嘅背後,都付出左好多而無人知道。特別如果一齊玩山賽就更具挑戰性,始終男女一般體能上已經有一定嘅差距,體力上男嘅要有1.5x嘅體能供另一半備用。係心理上,亦因為要就番另一半嘅pacing,而俾人不停咁『界』嘅感覺都幾無癮。講D親身經歷,話說,前排見到有位師兄好Sweet咁陪女友玩XTE嘅城門仲夏夜比賽 (利申:小弟都係)。案發係上緊針山『打大佬』嘅途中,見到師兄女友上到山腳都已經謝謝地,呢個時候師兄當然會講D鼓勵性嘅說話啦。「加油呀, 就到啦…..」下刪數十字 ! 點知女友著左火咁回左一句: 『唔好同我講咁多廢話,等我上埋呢座山先同我講野。』 我即時眼見師兄『皮已收』的樣子,只有收口繼續慢慢守護著女友上山。

又話說有一次,在大潭比賽。 途中有一對Pace同我地相近嘅情侶一齊跑,我地4個人8條腿差唔多見足全程,途中大家都忙著照顧身邊果個,我見師兄無微不至咁守護女友,而佢又見我噓寒問暖 (誇張左)所以大家都未有交談。到衝線時,大家都係差唔多嘅時間完成,在終點再次相遇,這時候師兄跟我互望了一眼,點一點頭,有種~共鳴。

當時如果有佢Whatsapp,我會Send 一張圖俾佢:
識揀一定係揀跑山女做女朋友_02師兄辛苦了~~~!

更多:
Fitz.hk Facebook專頁
追不到的跑步女孩 (一)
追不到的跑步女孩 (二)
十個必追或(even better)娶港 跑女的理由
Fitz Running 跑步

本文屬作者意見,不代表Fitz立場。


文章為作者意見,不代表Fitz立場。

歡迎投稿: https://fitz.hk/contribute/

廣告
壞人Ryan
八十後,現職某大型連鎖店之營運經理,自2011 首次參與毅行者後,漸漸愛上越野跑。參加過大大小小之香港路賽,山賽 (凡人一名)。講究裝備,正宗『裝備L』 一名。 堅持屎波都要架生多。同時亦熱愛足球, 死忠曼聯迷。