傳統以來「長跑運動會傷膝頭」,係大多數人相信嘅說法,不過佢其實係醫學上懸案,未有太多實證。直到2012年,一位英國醫生參加馬拉松後先有所發現。

醫生跑馬仔痛到唔郁得

《紐約時報》最近報導,2012年英國倫敦大學醫學教授 Alister Hart,接手研究長跑同膝頭嘅關係,於是佢參加咗人生第一場馬拉松,結果賽後腳痛咗兩星期,促使佢搵嚟更多人,進行深入研究:

  • 徵集80位膝部從未受過傷嘅跑步新手,多數為40歲嘅中年人士
  • 呢班新手要應付四個月之後嘅倫敦馬拉松
  • 開始操練嘅兩星期,Alister 為佢哋照 MRI (磁力共震),發現唔少人膝部都有輕微受傷
  • 操練咗4個月,當中71位新手都能完成比賽,平均成績5小時20分
  • 比賽後,Alister 再為佢哋照 MRI,發現之前傷患有好轉,膝部四周仲有新組織,形成一個保護層
Alister Hart

Alister 話,過去大家都因為跑步動作,就判定對膝部有不良影響。不過今次研究就發現,跑步雖有機會令膝部受傷,但同時間亦能重建受損部位,甚至加以保護。所以,Alister 作出一個劃時代嘅結論: 「跑步對膝頭十分有益」!

不過 Alister 亦表示,始終呢個只係短期研究,佢亦要做更多核實去了解當中關係。暫時只可以講,如果你膝頭之前無受過傷,跑步對你有益而無害。

資料: 紐約時報

張伯倫
自細肥仔一名,後來因發現患有脂肪肝,決心多做運動注重健康,曾參加並完成毅行者,關注所有健康資訊。