上次講過台灣長跑比賽補給飲食種類繁多,誇張過香港嘅美食嘉年華。其實比賽嘅獎品更加令人O晒咀。

有台灣跑友報料話,好多鄉鎮搞嘅地區長跑賽,都搵到當地企業出手贊助。呢啲企業,好多都係出產鄉縣嘅土特產,佢哋亦好樂意送出禮物,畀參加者可以拎呢啲產品做手信以作推廣。最著名係嘉義沿海馬拉松送烏魚子、台東成功馬拉松送烤飛魚、屏東馬送紅豆,高樹馬拉松送水果。

嫌土特產老土,唔夠豪氣? 學高雄市長韓國瑜話齋:「台灣發大財!」參加呢幾場馬拉松或者可以發下橫財。

旗山馬拉松: 香蕉樹一棵

賽事會跑入香蕉園

旗山盛產香蕉,跑旗山除咗可以品嚐香蕉湯、香蕉蛋糕、香蕉蛋捲、香蕉脆片呢啲補給品,跑完之後嘅大抽獎,大獎就係一棵香蕉樹。得獎者可以幫棵樹改名,以及定期收到香蕉樹嘅收成,有關方面保證有15公斤嘅香蕉送畀你!


比賽現正接受報名: 報名連結

土庫櫻花馬拉松: 真.鑽戒

送獎商戶嘅老闆娘  (最後送出嘅鑽戒同老闆娘手上嗰隻有唔同)

舊年1月喺雲林縣搞嘅土庫櫻花馬拉松,由補給到賽後抽獎落重本。抽獎禮物由當地商家送出嘅鑽戒,價值台灣3萬 (約7600港幣)。有關商戶強調,送出嘅係真鑽戒,無花無假。

而縣長、議長亦送雪櫃同電視機等嘅抽獎禮物,將長跑比賽搞到似禮義廉嘅蛇宴咁。

東勢半程馬拉松: 韓國名車

名車得獎者

香港嘅長跑賽,馬拉松跑到 Sub-3 都係得$1000大洋,想跑步發財,不妨諗下北港呢場比賽。

舊年3月嘅比賽,大會送出韓國名車一部作抽奬禮物,價值64萬台幣 (約16萬港幣)。而且唔剩止跑全馬有機會得獎,就算跑5公里嘅參加者,都有份抽獎。據講得奬者中獎之後,驚係騙案唔敢上台領獎咁話。

北港朝天宮路跑: 足金神像

舊年12月舉行嘅北港朝天宮路跑,係當地秒爆賽事,全因禮物豐富。除咗有當地特產北港狀元餅、媽祖福袋外,抽獎禮物仲有足金媽祖神像,價值8萬台幣 (約2萬港幣)。

呢一類台灣地區賽事,全馬報名費介乎600-700台幣,大概150蚊港幣。以小搏大,值得諗諗。

Fitz連結: https://fitz.hk/?p=126770

其他文章:

廣告
張伯倫
自細肥仔一名,後來因發現患有脂肪肝,決心多做運動注重健康,曾參加並完成毅行者,關注所有健康資訊。